ओमप्रकाश गुप्ता
दाङ २४ चैत । राष्ट्रिय जनमोर्चा दाङका अध्यक्ष गणेश आचार्यले नेपालको वर्तमान राजनीतिक अवस्थाप्रति तीव्र असन्तुष्टि व्यक्त गर्दै प्रजातान्त्रिक आन्दोलनमा कुनै योगदान नभएका व्यक्तिहरू आज राजनीतिक नेतृत्वको अग्रपंक्तिमा देखिनु विडम्बनापूर्ण भएको बताएका छन् ।
राष्ट्रिय जनमोर्चा दाङ देउखुरीद्वारा राप्ती गाउँपालिका–१ भालुवाङमा आयोजित ३६औँ जनआन्दोलन दिवस कार्यक्रमलाई सम्बोधन गर्दै– ‘राजनीतिमा कुनै भूमिका नभएकाहरू नै आज हिरोका रूपमा प्रस्तुत भइरहेका छन् ।’
राजनीतिक मूल्य, योगदान र इतिहासको अवमूल्यन भइरहेको नेता आचार्यले आरोप लगाए । कार्यक्रममा बोल्दै उनले जनआन्दोलनको ऐतिहासिक महत्व सम्झाउँदै अहिलेको राजनीतिक नेतृत्वले त्यसको मर्म र उद्देश्यलाई आत्मसात् गर्न नसकेको बताए ।
अध्यक्ष आचार्यले वर्तमान सरकारप्रति लक्षित गर्दै जनअपेक्षाअनुसार काम गर्न नसकेको पनि बताए ।
उनले राजनीतिक दलहरूलाई आत्मसमिक्षा गर्न आग्रह गर्दै जनमुखी नीति तथा कार्यक्रममार्फत जनताको भरोसा जित्नुपर्ने आवश्यकता औंल्याए । ‘राजनीति सेवा हो, सत्ता होइन,’ उनले भने– ‘यदि राजनीति सेवा र उत्तरदायित्वबाट टाढा जान्छ भने त्यसले देश र जनतालाई दीर्घकालीन क्षति पुर्याउँछ।”
कार्यक्रममा बोल्दै अखिल नेपाल युवक संघका पूर्व केन्द्रीय अध्यक्ष काशिनाथ पोख्रेलले पनि वर्तमान राजनीतिक अवस्थाप्रति चिन्ता व्यक्त गरे । उनले जनआन्दोलनको मर्मअनुसार शासन सञ्चालन हुन नसकेकोमा चिन्ता व्यक्त गरे ।
कार्यक्रम राष्ट्रिय जनमोर्चा दाङका जिल्ला अध्यक्ष गणेश आचार्यकै अध्यक्षतामा सम्पन्न भएको थियो भने कार्यक्रम सञ्चालन पार्टीका जिल्ला उपाध्यक्ष महेश रिजालले गरेका थिए। कार्यक्रममा स्थानीय नेता–कार्यकर्ताहरूको उपस्थिति रहेको थियो।
