काठमाडौँ । राष्ट्रिय सभाका सदस्य तुल प्रसाद विश्वकर्माले देश कता जाने र कुन दिशा समात्ने अन्योलतामा रहेको बताउनु भएको छ ।

विश्वकर्माले विहिबार चैत १९ गते सम्पन्न राष्ट्रिय सभाको बैठकमा मन्तव्य राख्दै, ‘देशको महत्वपूर्ण पक्ष देशको राष्ट्रियता, अखण्डता र सार्वभौमिकताको रक्षा हुनुपर्दछ । त्यसका साथै लोकतान्त्रिक गणतन्त्रको रक्षा हुनुपर्दछ । धर्मनिरपेक्षतालाई हामीले संरक्षण गर्नुपर्दछ, यो प्रमुख कुरा हो । यसको आधारमा रहेर नयाँ सरकार चल्न सक्छ कि सक्दैन भन्नेमा नै देश र जनता अन्यौलतामा छन्  ।’

देशको आधारभुत समस्यालाई सम्बोधन नगरिकन सरकारको परिवर्तनले मात्रै देशमा शान्ति तथा सुव्यवस्था आउन नसक्ने विश्कर्माले बताउनु भयो ।

विश्कर्माले– हिंजो संसदमा मोनरो डक्ट्रिनको नीति अवलम्बन गर्ने एवं नेपाली सेनाको संख्या घटाउने भन्नेहरू सत्तामा पुगेका छन् । उनीहरूको त्यो सोंच र विचार यथावत छन् वा हराएका छन् त्यो विचारणीय भएको बताउनु भयो ।

‘डक्ट्रिनको नीति अनुसार ठूला देशको अन्तर्गत साना देशहरूले आफ्‌नो अस्तित्व स्वीकार्नुपर्छ भन्ने हुन्छ ।’ विश्वकर्माले अगाडि भन्नु भयो– ‘यस खालका विचारहरूको बारेमा नयाँ सरकारले कसरी हेर्छ भन्ने बारे जनता स्पष्ट हुन चाहन्छन् ।’

चर्चामा रहेको कार्की आयोगको छानविनको प्रतिवेदन एकपक्षिय र खोटपूर्ण रहेको विश्वकर्माले बताउनु भयो । ‘त्यसले समग्र घटनाको निश्पक्ष छानविन गर्न सकेको छैन ।’ विश्कर्माले अगाडि भन्नुभयो– ‘भदौ २४ गते जनु ताण्डव मच्चाइयो, सरकारी कार्यालयदेखि कैयौँ व्यक्तिका घर सम्पत्ती जलाउने र ध्वस्त पार्ने काम गरियो, त्यसको पछाडि कस्को हात थियो ? त्यसलाई खोजविन गर्नुपर्ने कि नपर्ने ? त्यसमा दोषी ठहरिएकाहरूलाई कारवाहीको दायरामा ल्याउनु पर्ने कि नपर्ने ?’

प्रतिवेदन नबोलेको विश्वकर्माले बताउनुभयो, ‘जुन छानविन आयोगको प्रतिवेदन आएको छ, त्यो अधुरो छ । त्यसप्रति हाम्रो पार्टीको विमती छ ।’

देशमा हिंजोदेखि रहिआएका जतिपनि विकृती र विसंगतीहरू छन्, देशमा भएका व्यापक भ्रष्टाचार, नीतिगत भ्रष्टाचार, महंगी र जनताले शिक्षा, स्वास्थ्य एवं दैनिक रुपमा भोगनुपरेका समस्याहरू यथावत नै रहेकोले त्यसलाई यो सरकारले कसरी हल गर्छ आगामी दिनहरूमा स्पष्ट हुने विश्कर्माले बताउनु भयो ।

‘देशको उत्पादनशिल युवाशक्ति विदेश पलायन भइरहेको छ । उनीहरूलाई देशमा रोक्ने र देश मै रोजगार दिने योजना छैन ।’ विश्वकर्माले भन्नुभयो, ‘त्यसलाई यो सरकारले सम्बोधन गर्न सक्छ कि सन्दैन ? सकेमा मात्रै यो देश अघि बढ्न सक्छ ।’

महिला समस्या, दलित उत्पीडनका घटनाहरू दिनदिनै बढ्दै गइरहेको विषयमा विचार राख्दै विश्वकर्माले भन्नुभयो– ‘दलित पक्षमा प्रत्याभूत गरेको नेपालको संविधानको धारा ४० लाई कार्यान्वयन गर्न अहिलेसम्म काननु बन्न नसकेको अवस्था छ । यो अत्यन्त ठूलो विडम्बना हो । सिंगो दलित समुदाय आज पनि छुवाछुत, भेदभाव र जातिय उत्पीडनको मारमा पिल्सिरहेका छन् ।’

क्षेमा याचना माग्दैमा दलितप्रतिको सरकारको जिम्मेवारी पुरा नहुने विश्वकर्माले बताउनु भयो ।