काठमाडौं । प्रतिनिधिसभा संसद्को पहिलो अधिवेशन आजदेखि शुरु भएको छ । गत फागुन २१ मा सम्पन्न भएको निर्वाचन पछि निर्वाचित प्रतिनिधिसभा सदस्य संसदको आज पहिलो बैठक सम्पनन भएको हो ।
बैठक सिंहदरबारस्थित निर्माणाधीन संघीय संसद्मा आज दिउँसो २ बजेदेखि आह्वान गरिएको थियो ।
रास्वपा सभापति रवि लामिछाने ;
रास्वपा सभापति रवि लामिछानेले अब संख्याकै बलमा प्रतिशोध र अत्याचार नहुने बताएका छन् । प्रतिनिधिसभाको पहिलो बैठकलाई सम्बोधन गर्ने क्रममा उनले आस्थाकै आधारमा अब कसैलाई पनि फरक व्यवहार नहुने बताए । तर सुशासनको वेग भने नरोकिने लामिछानेले बताए ।
नेपाली कांग्रेसका सांसद भीष्मराज आङदेम्बे ;
नेपाली कांग्रेसका सांसद भीष्मराज आङदेम्बेले प्रधानमन्त्री बालेन्द्र शाहसँग जाँचबुझ आयोगको प्रतिवेदन सरकारबाट सार्वजनिक हुन्छ कि हुँदैन ? भनेर प्रश्न गरेका छन् । बिहीबार प्रतिनिधिसभाको पहिलो बैठकमा बोल्दै आङदेम्बेले पूर्व न्यायाधीश गौरीबहादुर कार्की आयोग र सरकारको नियतमाथि नै प्रश्न गर्दै यस्तो प्रश्ज सोधेका हुन् ।
‘जाँचबुझ आयोगको प्रतिवेदन स्वयं सरकारले सार्वजनिक पनि गर्ने कि प्रधानमन्त्रीजीले पनि गोरखापत्र पढ्ने ?’ आङदेम्बेले भने ।
भदौ २४ गते संसद् भवन र सिंहदरबार जलेको विषयमा आयोगको मौनतामाथि पनि उनले प्रश्न उठाए । ‘किन खरानी भयो संसद् भवन, किन जल्यो सिंहदरबार ? कसले जलायो ?’, उनले प्रश्न गरे, ॅभदौ २३ र २४ गतेका घटना एकएक केलाउन जरुरी छ ।’
एमाले नेता रामबहादुर थापा ;
नेकपा एमालेका संसदीय दलका नेता रामबहादुर थापाले संसद् बैठकलाई दलीय आधारमा सम्बोधन गर्दै जेनजी आन्दोलनको घटनामा रास्वपाकै संलग्नता रहेको बताउँदै टिप्पणीसहित प्रधानमन्त्रीलाई बधाई दिए ।
‘रास्वपाको अघोषित रंग क्रान्ति भदौ २३ र २४ मा सफलतापूर्वक गरियो । फागुन २१ गते आम निर्वाचतनमार्फत निलोक्रान्ति सम्पन्न गरियो’, थापाले भने ।
रास्वपा पहिलो दल बन्नुमा नेपाली सेनादेखि बारबरा फाउन्डेसनसम्मको हात रहेको बताए । ‘यो सबै परिणामका पछाडि मुख्यतः नेपाली सेना, ब्युरोक्रेसी, सुशीला सरकार र बारबरा फाउन्डेसन विजयका आधारहरू हुन्’ थापाले भने ।
नेकपाका नेता वर्षमान पुन ;
नेकपाका नेता वर्षमान पुनले राष्ट्र निर्माणको लागि सरकारलाई सघाउन तयार रहेको बताएका छन् । प्रतिनिधि सभाको बैठकलाई सम्बोधन गर्दै सामाजिक न्याय र रूपान्तरणको लागि सरकारलाई साथ रहने बताए।
उनले लोकतन्त्र, गणतन्त्र र समावेशिताको मुद्दामा सम्झौता गर्न नसक्ने बताए । उनले निर्वाचनबाट आएको जनमतलाई स्वीकारेर रचनात्मक रूपमा सरकारलाई सघाउन तयार रहेको बताए ।
श्रम, संस्कृति पार्टीका सांसद हर्क साम्पाङ ;
श्रम, संस्कृति पार्टीका अध्यक्षसमेत रहेका सांसद हर्क साम्पाङले अमेरिकी सहायता परियोजना एमसीसी खारेज गर्न माग गरेका छन् । ‘देशको लस्वाधिनता र असंलग्न परराष्ट्र नीतिलाई बचाइ राख्न सैन्य रणनीति उद्देश्यका साथ सुरु गरिएको असमान राष्ट्रघाती व्यापारिक सन्धी एमसीसी खारेज गर्नुपर्छ भनेर माग गर्दछु ।’
राष्ट्रिय प्रजातन्त्र पार्टी(राप्रपा) सांसद ज्ञानेन्द्र शाही ;
राष्ट्रिय प्रजातन्त्र पार्टी (राप्रपा) सांसद ज्ञानेन्द्र शाहीले प्रदेश संरचना खारेज गर्न वर्तमान सरकारलाई दुई तिहाइ बहुमत पुर्याउन आफ्नो दल तयार रहेको बताएका छन् ।
बिहीबारको प्रतिनिधिसभाको बैठकलाई सम्बोधन गर्दै शाहीले अनावश्यक प्रदेश संरचना सञ्चालनका लागि वार्षिक १ खर्ब रकम खर्च भइरहेको बताएका हुन् ।
स्वतन्त्र सांसद महावीर पुन ;
प्रतिनिधि सभा सदस्य महावीर पुनले सदनमा आफ्नो भूमिका पक्ष विपक्ष भन्दा पनि निष्पक्ष हुने बताए। उनले अगाडि भने, ‘म एउटा अचम्मको सांसदको रूपमा आएको छु, म फरक छु, बोल्ने काम गर्ने कुरा पनि फरक छ। म यो ठाउँमा आउनै नपर्ने मान्छे हुँ ।’
