काठमाडौं । पत्नीहत्या घटनामा दोषी ठहर सशस्त्र प्रहरीका पूर्व डीआईजी रञ्जन कोइराला रिहा भएका छन् । ८ वर्ष ६ महिना कैद सजाय भुक्तान गरेर डीआईजी कोइराला बिहीबार जेलमुक्त भएका हुन् ।
सर्वोच्च अदालतको आदेशपछि डिल्लीबजार कारागार प्रशासनले कोइरालालाई जेलमुक्त गरेको हो । सर्वोच्च अदालतले १५ असारमा कोइरालाको सजाय घटाउँदै ८ वर्ष ६ महिना कायम गरेको थियो ।
श्रीमती गीता ढकालको हत्या गरेपछि पूर्वडीआईजी कोइराला जेल परेका थिए । सो मुद्दामा जिल्ला र पुनरावेदन अदालतले सर्वश्वसहित जन्मकैदको फैसला सुनाएको थियो ।
तर, प्रधानन्यायाधीश चोलेन्द्रशमशेर जबरा र तेजबहादुर केसीको इजलासले उनको सजाय घटाउने फैसला गरेको थियो ।
तत्कालीन डीआईजी कोइरालाले २०६८ माघमा पत्नी गीताको हत्या गरेका थिए । महाराजगञ्जमा श्रीमतीको हत्या गरेर उनले घटना लुकाउन पालुङमा शव जलाएका थिए ।
दोस्रोपटक घटनास्थल हेर्न पुगेका उनी २८ माघ ०६८ मा थानकोटबाट पक्राउ परेका थिए ।
