काठमाडौं । कम्युनिष्ट नेता एवं पूर्वसांसद बर्मन बुढाको आज पशुपति आर्यघाटमा अन्त्येष्टि गरिएको छ । उपराष्ट्रपति नन्दबहादुर पुनले पशुपतिस्थित विद्युतीय शवदाहगृहमा अन्त्येष्टि गर्नुअघि उहाँको पार्थिव शरीरमा राष्ट्रिय झण्डा ओढाएर अन्तिम श्रद्धाञ्जलि अपर्ण गर्नुभयो ।
लामो समयदेखि क्यान्सर रोगबाट पीडित हुनुभएका कम्युनिष्ट आन्दोलनका अगुवा बुढाको आज बिहान पाटन अस्पतालमा उपचारका क्रममा ९० वर्षको उमेरमा निधन भएको थियो ।
नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’, सभामुख अग्नि सापकोटा, पूर्वसभामुखद्वय कृष्णबहादुर महरा लगायत कार्यकर्ताहरुले पशुपति आर्यघाट पुगेर उहाँको पार्थिव शरीरमा अन्तिम श्रद्धाञ्जलि दिनुभएको थियो ।
अध्यक्ष प्रचण्डले नेता बुढाको पार्थिव शरीरमा पार्टीको झण्डा ओढाएर श्रद्धाञ्जलि अर्पण गर्नुभएको थियो । बुढा तत्कालीन एकता केन्द्रको तर्फबाट २०४८ सालमा रोल्पाबाट प्रत्यक्ष निर्वाचित सांसद बनेका थिए ।
