काठमाडौँ । अन्तर्राष्ट्रिय नेपाली एकता समाजल एक सय सोह्रौँ अन्तर्राष्ट्रि श्रमिक महिला दिवस मनाएको छ ।
नेकपा (मसाल) का महामन्त्री मोहनविक्रम सिंहको प्रमुख आतिथ्यमा २०८२ फागुन २४ गते (मार्च ८) आइतबार अबेर साँझ भर्चुअल माध्यमबाट सो कार्यक्रम मनाइएको हो ।
कार्यक्रममा प्रमुख अतिथिको मन्तव्य राख्दै महामन्त्री सिंहले देशको समसामयिक राजनीतिक परिस्थितिमा रास्वपाले विजय हासिल गर्नु भनेको अमेरिकी साम्राज्यवादले विजय हासिल गर्नु रहेको दाबी गर्नुभयो ।
सही चेतनाको अभावमा प्रवासी नेपालीले समेत रास्वपाको वास्तविकता नबुझेको उहाँको भनाइ थियो ।
उहाँले भन्नुभयो– ‘सही राजनीतिक चेतनाका अभावमा नै प्रवासी नेपालीले घरपरिवारलाई घण्टीमा भोट हाल्न भनेका हुन्छन् तर त्यसो गर्नु भनेको उनीहरूले आफ्नो खुट्टामा आफै बन्चरो हान्नु हो भन्ने उनीहरूले बुझेका हुँदैनन् ।’
अहिले पनि साम्राज्यवादीले युद्धको विश्व वातावरण कायम गरेको स्पष्ट पार्दै उहाँले महिलाले सबैभन्दा बढी युद्धको विरोध गर्नुपर्ने आवश्यकतामा जोड दिनुभयो ।
उहाँका अनुसार साम्राज्यवादी युद्धबाट सबैभन्दा बढी महिला नै पीडित हुने भएकाले महिलाहरूले युद्धको विरोध गर्नुपर्ने आवश्यकता देखिन्छ ।
कार्यक्रममा मन्तव्य राख्दै राष्ट्रिय जनमोर्चाकी केन्द्रीय उपाध्यक्ष तथा प्रवक्ता दुर्गा पौडेलले नेपालमा सञ्चालन भएको महिला अधिकारपत्र अभियानको ऐतिहासिक महत्त्व रहेको स्पष्ट पार्नुभयो ।
उहाँले उक्त गौरवशाली अभियानलाई महिला आन्दोलनले अझै अगाडि बढाउनुपर्नेमा जोड दिनुभयो ।
अखिल नेपाल महिला सङ्घकी अध्यक्ष मीना पुनले साम्राज्यवादका विरुद्ध समाजवादी आन्दोलनसँगै महिला मुक्ति आन्दोलनलाई अगाडि बढाउनुपर्ने आवश्यकतामा जोड दिनुभयो ।
कुन परिवेशमा मार्च ८ मनाउन सुरु गरियो भन्नेबारे विस्तारमा चर्चा गर्दै उहाँले अहिले पनि विश्व र नेपालका समेत महिलाका समस्या गम्भीर रहेकाले महिला आन्दोलनलाई पनि सशक्त बनाएर लैजानुपर्ने आवश्यकतामा जोड दिनुभयो ।
राजमो केन्द्रीय सल्लाहकार तथा वामपन्थी नेता आनन्द शर्माले अहिलेको नयाँ पिँढीलाई एआईले प्रभावित पारेको बताउँदै उनीहरू सिद्धान्त, राजनीति, विचार, दृष्टिकोणजस्ता विषयबाट पछि हटेको धारणा राख्नुभयो ।
उहाँले नयाँ पिँढीको यस्तो गैरवैचारिक भूमिकाका कारणले नै फागुन २१ गतेको चुनावमा फरक नतिजा आएको बताउनुभयो ।
कार्यक्रममा अन्तर्राष्ट्रिय नेपाली एकता समाजका अध्यक्ष शक्तमान बुढाथोकी, अखिल नेपाल प्रगतिशील लेखक सङ्घ (अन्पा) का अध्यक्ष समीर सिंह र मूल प्रवाह अखिल भारत नेपाली एकता समाजका पूर्व अध्यक्ष ठाकुर खनालले पनि मन्तव्य राख्नुभएको थियो ।
अन्तर्राष्ट्रियद्वारा मार्च ८ मनाउन गठन गरिएको उपसमितिकी संयोजक अमृता रानाथापाको अध्यक्षता तथा उपसमितिकै सदस्य माया आचार्यको सञ्चालनमा अघि बढेको उक्त कार्यक्रममा सहभागीलाई अन्तर्राष्ट्रियका महासचिव खुम रायमाझीले स्वागत गर्नुभएको थियो ।
