काठमाडौँ । अखिल नेपाल महिला सङ्घले एक सय सोह्रौँ अन्तर्राष्ट्रिय श्रमिक महिला दिवसको अवसरमा शोषितपीडित मुक्तिकामी महिला तथा न्यायप्रेमी जनसमुदायलाई अभिवादन गरेको छ ।
अध्यक्ष मीना पुनको हस्ताक्षरमा २०८२ फागुन २४ गते (८ मार्च) आइतबारका दिन प्रेसवक्तव्य जारी गर्दै सङ्घले जनताप्रति अभिवादन व्यक्त गरेको हो ।
वक्तव्यमा सन् १९१० मा जर्मनीको कोपेनहेगनमा सम्पन्न दोस्रो महिला अन्तर्राष्ट्रिय विश्व नारी दिवस मनाउने निर्णय गरेको स्मरण गरिएको छ ।
अहिले पनि उत्पीडित राष्ट्र र जनताको विरुद्ध साम्राज्यवादले बर्बर युद्ध थोपरिएको सन्दर्भ जोड्दै महिला सङ्घले सम्पूर्ण महिला तथा न्यायप्रेमी जनतालाई त्यसका विरुद्ध आवाज उठाउन अपिल गरिएको छ ।
यस्तो छ, प्रेसवक्तव्यको पूर्ण पाठ :
“आज ८ मार्च एक सय सोह्रौँ अन्तर्राष्ट्रिय श्रमिक महिला दिवस । यस अवसरमा नेपाललगायत विश्वभरिका सम्पूर्ण शोषितपीडित मुक्तिकामी महिला तथा न्यायप्रेमी जनसमुदायलाई अभिवादन गर्दछौँ र हृदयदेखि शुभकामना व्यक्त गर्दछौँ ।
८ मार्च को इतिहासले हामीलाई दुईओटा विषयसँग अभिन्न रूपले जोडिन्छ : प्रथम महिला मुक्ति आन्दोलनलाई समाजवादी आन्दोलनसँग जोडेर अगाडि बढाउनुपर्दछ । दोस्रो महिला आन्दोलनलाई साम्राज्यवादी युद्धको विरोध गर्दै विश्वशान्ति र मानवअधिकारको रक्षाका आन्दोलनसँग जोडेर अघि बढ्नुपर्दछ ।
सन १९०७ मा समाजवादी महिलाको प्रथम अन्तर्राष्ट्रिय सम्मेलन सम्पन्न भयो । सम्मेलनले क्लारा जेटकिनलाई सेक्रेटरीमा चयन गर्यो । त्यो सम्मेलनले महिलाको पूर्ण मतदानको अधिकारसम्बन्धी प्रस्ताव पारित गर्यो । सन् १९१० मा कोपनहेगेनमा दोस्रो अन्तर्राष्ट्रिय सम्मेलन भयो । सम्मेलनले क्लारा जेटकिनले राखेको ८ मार्चलाई अन्तर्राष्ट्रिय महिला दिवसको रूपमा मनाउने प्रस्तावलाई पारित गर्यो । सम्मेलनले महिलाको मतदानको अधिकार, न्यूनतम ज्याला, आठ घण्टाको काम, आमा र बच्चाको सुरक्षा, समान काममा समान ज्यालालगायतका महत्त्वपूर्ण माग राखेर महिला मजदुरले गरेको आन्दोलनको समर्थन गर्दै यी सबैको प्राप्तिका लागि आन्दोलनलाई सङ्गठित गर्दै अघि बढ्ने निर्णय गर्यो भने महिला मुक्ति आन्दोलनलाई समाजवादी आन्दोलनसँग जोडेर अगाडि बढाउनपर्नेमा जोड दियो साथै साम्राज्यवादले निम्त्याएको प्रथम विश्वयुद्धको भण्डाफोर गरेका थिए र साम्राज्यवादी युद्धले जनतामा थोपरेको बर्बरताको विरुद्ध आवाज उठाएका थिए ।
आज सयौँ वर्षपछाडि पनि विश्वभरि नै महिलाले असमानता, बेरोजगारी, गरिबी, हिंसा, बलात्कार, बेचविखन, आदिबाट पीडित छन् । यी सबैका विरुद्धको सङ्घर्ष आजको हाम्रो आवश्यकता हो ।
अर्कोतर्फ अहिले साम्राज्यवादी युद्ध झन्पछि झन् बढ्दै गइरहेको छ । पछिल्लो समयमा प्यालेस्टाइन, युक्रेन, इरानमाथिको हमला त्यसको ज्वलन्त उदाहरण हुन् । यी सबै साम्राज्यवादी युद्धको विरुद्धमा आवाज उठाउनु संसारभरको क्रान्तिकारी महिलाको कर्तव्य हो । आज ८ मार्च अन्तर्राष्ट्रिय महिला दिवसको अवसरमा संसारभरिका न्यायप्रेमी महिलाले साम्राज्यवादी युद्धको पनि विरोध गर्नुपर्ने आवश्यकता देखिन्छ ।”
