सिबी अधिकारी, काठमाडौँ ।
गत भदौमा भएको जेनजी आन्दोलनपछि गठन भएको सरकारको एउटा मात्रै जिम्मेवारी थियो, आवधिक निर्वाचन । छोटो समयमा निर्वाचन गर्ने जिम्मेवारीका साथ गठन भएको सरकारमा गृहमन्त्रालयको जिम्मेवारीमा आएका थिए, ओमप्रकाश अर्याल ।
जेनजी आन्दोलनका क्रममा कारागारबाट कैदी भागेका थिए, हातहतियार पनि लुटिएका थिए । राजनीतिक दलप्रति आममानिसमा विश्वास गुमेको अवस्था थियो । सुरक्षा मुख्य चुनौती थियो । आम मानिसमा पनि समयमै निर्वाचन हुन्छ वा हुँदैन भन्ने संशय थियो ।
अन्तत: समयमै शान्तिपूर्ण रूपमा निर्वाचन भयो । बिहीबार निर्वाचनको जिम्मेवारी पूरा गरेपछि गृहमन्त्री अर्यालले भने– ‘एउटा महत्त्वपूर्ण जिम्मेवारी पूरा भयो, नागरिक सरकारले प्रमुख अभिभारा पूरा गरेको छ ।’
निर्वाचन सम्पन्न भएपछि शुक्रबार दिनभरजसो मन्त्री अर्यालले धन्यवाद तथा शुभकामनाका कैयौँ फोनकल, सन्देश प्राप्त गरिरहे । मन्त्रालयमै आएर बधाई दिनेको सङ्ख्या पनि बाक्लो थियो ।
उनले शुभचिन्तकलाई भने– ‘आजबाट जिम्मेवारीको भारी बिसाएर हल्का महसुस भएको छ । मतपरिणामपछि नयाँ सरकारलाई जिम्मेवारी हस्तान्तरण गरेर फर्किन आतुर छौँ ।’
उनले यसका लागि प्रधानमन्त्री सुशीला कार्कीप्रति विशेष आभार व्यक्त गरे । साथै निर्वाचन सम्पन्न गराउन सहयोग गर्ने गृहसचिव, मन्त्रालयका महाशाखा प्रमुखसहित सुरक्षा निकायका उच्च अधिकारीलाई धन्यवाद दिए ।
‘निजामति प्रशासनलाई सधैँ दोष दिने गरिएको छ । त्यो मात्रै साँचो होइन, निजामतिको साथमै काम फत्ते भएका छन् खालि नेतृत्व कसले कसरी गरेको छ भन्ने महŒवपूर्ण कुरा हो’ गृहमन्त्री अर्यालले भन्नुभयो ।
गृहमन्त्री अर्याल छ महिनाभित्र निर्वाचन गरेर मुलुकलाई निकास दिने दायित्वमा कहिल्यै विमुख हुनुभएन । उनले भने– गृहमन्त्रालय पावर एक्सरसाइज गर्ने मन्त्रालय भन्थे । मैले नेतृत्व सम्हाल्दाको अनुभवमा यो त शान्ति मन्त्रालयको भूमिकाजस्तो देखियो । परिस्थितिलाई काबुबाहिर जान नदिन अपनाउनुपर्ने संयमता र मन्त्रालयको मुख्य जिम्मेवारीबाट कहिल्यै बिचलित भइनँ र निरन्तर आफ्नो इमानन्दारिताको अभ्यास गरेँ ।’
राष्ट्रपतिको निर्देशन र प्रधानमन्त्रीको नेतृत्वमा सम्बद्ध सबै पक्षको सहयोगका कारण मुलुकभर एकै चरणमा मतदान कार्य सम्पन्न भएको उनको बुझाइ छ ।
लोकतान्त्रिक प्रकृयाको महत्त्वपूर्ण अभ्यासको रूपमा रहेको निर्वाचनमार्फत जनादेश लिनु संवैधानिक र कानुनी दृष्टिले सर्वोत्तम पक्ष हो भन्दै उनले यस निर्वाचनको माध्यमबाट संविधान कार्यान्वयन एवम् नेपाली जनताले प्राप्त गरेको हक अधिकारको संस्थागत गर्नमा महत्त्वपूर्ण उपलब्धि हासिल भएको उल्लेख गरे ।
अर्यालले निर्वाचनलाई स्वतन्त्र, निष्पक्ष, भयरहित र मर्यादित वातावरणमा सफलतापूर्वक सम्पन्न गर्न देशव्यापी रूपमा मतदाताले प्रकट गरेको उत्साह र सक्रिय सहभागिताले लोकतन्त्रप्रतिको निष्ठा र अटल प्रतिबद्धता अभिव्यक्त भएको उल्लेख गरे ।
उनले निर्वाचनको मतदान कार्य शान्तिपूर्ण र उत्साहजनक रूपमा सम्पन्न भएकोमा सबैलाई धन्यवाद दिए ।
गृहमन्त्री अर्यालले सुरक्षा चुनौतीलाई आफूहरूले नजिकबाट नियालेर सोहीअनुसार व्यवस्थापन गरिएको बताए ।
उनले थपे– ‘यहाँ तपाईंहरूले निर्देशन दिने गृहमन्त्री र निर्देशन पालना गर्ने कर्मचारी एवम् सुरक्षाकर्मी भेट्नुहुन्न । निर्देशनमुखी कार्यशैली फेरेर सामूहिक निर्णय गर्ने अभ्यास कार्यान्वयन भएको छ । आवश्यक कर्मचारी, सुरक्षा निकायका प्रतिनिधि सबै बसेर सामूहिक सरसल्लाह गर्छौं र आवश्यक निर्णय लिन्छौँ ।’
गत पुसमा मधेसमा देखिएका साम्प्रदायिक हिंसाका केही छुटपुट घटना भए । ती समस्याको पनि समयमै समाधान नगरिएको भए निर्वाचनको माहोल बिगार्न सक्थ्यो । (रासस)
