मङ्गलसेन । काठमाडौँका दुई सङ्घीय अस्पतालले स्वास्थ्य बिमा कार्यक्रम बन्द गर्दै गर्दा अछामको बयालपाटा प्रादेशिक अस्पतालमा पाँच महिनापछि सो सेवा सुचारु भएको छ ।
काठमाडौँमा त्रिवि शिक्षण अस्पताल र गङ्गालाल हृदयरोग केन्द्रले सेवा बन्द गर्दै गर्दा २०८२ माघ १ गतेदेखि लागु हुने गरी अस्पतालमा स्वास्थ्य बिमा कार्यक्रम पुन: सञ्चालनमा आएको हो ।
यसअघि न्याय हेल्थ नेपालद्वारा व्यवस्थापन हुँदै आएको बयालपाटा अस्पताल भदौ १ गतेदेखि सुदूरपश्चिम प्रदेश सरकार मातहत आएपछि अस्पतालमा स्वास्थ्य बिमा सेवा अवरुद्ध भएको थियो । आवश्यक सम्पूर्ण प्रक्रिया पूरा भएपछि माघ १ गतेदेखि पुन: स्वास्थ्य बिमा सेवा सुचारु गरिएको अस्पतालले जानकारी दिएको छ ।
प्रदेश सरकारको सामाजिक विकास मन्त्रालय मातहत अस्पताल सञ्चालनमा आएपछि सरकारी मापदण्डअनुसार उपचार शुल्क लाग्ने व्यवस्था गरिएको थियो तर अब स्वास्थ्य बिमा गरेका बिरामीले अस्पतालमा नि:शुल्क उपचार सेवा प्राप्त गर्न सक्नेछन् ।
माघ १ गतेदेखि स्वास्थ्य बिमा सेवा सुरु भएयता पाँच दिनको अवधिमा ७० जनाभन्दा बढी सेवाग्राहीले बिमाअन्तर्गत उपचार सेवा लिइसकेका छन् । यससँगै अस्पतालमा सामाजिक सुरक्षा एकाइअन्तर्गतका सेवा पनि सुचारु गरिएको छ ।
अतिविपन्न, असहाय तथा अपाङ्ग बिरामीलाई वडा तथा स्थानीय तहको सिफारिसका आधारमा उपचार सेवामा सहुलियत प्रदान गरिने अस्पतालले जनाएको छ ।
त्यस्तै अस्पतालमा चौबिसै घण्टा सशुल्क फार्मेसी सेवासमेत सुचारु भएको छ ।
