काठमाडौं । सिन्धुपाल्चोकको भोटेकोसी गाउँपालिका–४, फुल्पिङकट्टीमा गएको पहिरोमा परी एक जनाको मृत्यु भएको छ भने चार जना बेपत्ता भएका छन् । पहिरोमा पुरिएर बेपत्तामध्ये ३४ वर्षीया मिमासाङमु शेर्पाको शव फेला परेको प्रहरीले जनाएको छ ।
बुधबार राति २ बजेतिर खसेको पहिरोले ग्यान्जेन शेर्पाको घर पुरेको थियो । मृतक महिला ग्यान्जेनकी श्रीमती हुन् । ग्याल्जेन भने राजधानीमा सवारी चलाउने पेसामा रहेकाले घटनाका बेला घरमा थिएनन् ।
उनको परिवारका पाँचै सदस्य पहिरोमा परी बेपत्ता भएका हुन् । ७० वर्षीया आमा सोमबुटी शेर्पा, बैनी ३७ वर्षीया सेङसाङ शेर्पा, छोरीहरू १५ वर्षीया याङजी शेर्पा र १२ वर्षीया आङमु शेर्पा बेपत्ता छन् ।
पहिरोले फुल्पिङकट्टीकै नोर्साङ शेर्पाको घर बगाउनुका साथै पञ्चकन्या आधारभूत विद्यालयमा समेत क्षति पुर्याएको छ ।प्रहरी र स्थानीयले बेपत्ताको खोजी जारी राखेका छन् ।
