बेलबारी (मोरङ) । बेलबारी नगरपालिकाका धिमाल समुदायका लेखक टिकालाल धिमालको धिमालभाषी कृति ‘उज्यालो कुपी’ विमोचन भएको छ ।
बेलबारी नगरपालिकाका मेयर दिलप्रसाद राई र साहित्यकार तथा पूर्व सांसद हर्कमान तामाङलगायतले २०८२ पुस १० गते नेपाल आदिवासी जनजाति महासङ्घ, बेलबारीको सभाकक्षमा आयोजित कार्यक्रममाझ सो कृति लोकार्पण गर्नुभएको हो ।
उक्त कृतिमा धिमाल भाषाका ‘नाङ्घाका जीवन’ र ‘कापाल्ता मान्थु’ नाटक तथा तिनको नेपाली अनुवाद ‘ब्युँझिएको जीवन’ र ‘सङ्कल्प’ गरी चारओटा सामग्री समावेश छन् ।
सो अवसरमा मन्तव्य राख्दै नगरप्रमुख राईले अल्पसङ्ख्यक समुदायले आफ्नो भाषामा साहित्य सिर्जना गर्नु, कृति प्रकाशन गर्नु भनेको नाफा हुन्छ कि घाटा हुन्छ भन्ने कुरा नभएर भाषासाहित्य अन्य विकसित भाषासंस्कृति सँगसँगै दौडाउन सकियो कि सकिएन भन्ने कुरा बढी महत्त्वपूर्ण हुने बताउनुभयो ।
विशिष्ट अतिथि तामाङले धिमालले आफ्नो समुदायलाई मात्र नभएर सम्पूर्ण नेपाली जातिकै लागि काम गरेको र उनले जस्तै नेपाली भाषासंस्कृतिको जगेर्ना गर्न लाग्नुपर्नेमा जोड दिनुभयो ।
समीक्षक ईरानराईले भाषिक तथा सांस्कृतिक अतिक्रमण भइरहेको अवस्थामा नाटकसङ्ग्रहले आफ्नै संस्कृति र परम्परामा भएका अनपयुक्त पक्षलाई हटाउँदै असल पक्षलाई अझ विकसित रूपमा निरन्तरता दिनुपर्ने बताउनुभयो ।
समीक्षक केशु विरहीले नाटकसङ्ग्रहले धिमाल र नेपाली भाषाको नाट्यक्षेत्रलाई अगाडि बढाउने विश्वास गर्नुभयो ।
धिमाल जाति विकास केन्द्रका केन्द्रीय सल्लाहकार कृष्णबहादुर धिमालले बेलबारी क्षेत्रको धिमाल भाषा पूर्वको भन्दा बढी मौलिक रहेको जानकारी गराउनुभयो ।
बेलबारी प्रज्ञा–प्रतिष्ठानकी अध्यक्ष रेखा सुवेदीले मातृभाषाको संरक्षण र साहित्यिक विकासका लागि प्रतिष्ठान सदैव तयार रहेको बताउनुभयो ।
कार्यक्रममा वडाअध्यक्ष योगेन्द्र सुवेदी, समाजसेवीहरू प्रतापकुमार थापा, छत्र लिम्बू, केदार धिमाल, रुक्मिणी धिमाल, फणीन्द्रप्रसाद निरौला तथा साहित्यकारहरू दीप मङ्ग्राती, पुरन याखा, जेबी थुलुङ, कृष्ण गुरुङ, प्रेम गुरुङ, तीर्थराज सिग्देल, अजित धिमाल अतिथि हुनुहुन्थ्यो ।
धिमाल केन्द्र बेलबारीका अध्यक्ष शिवनाथ धिमालको अध्यक्षता तथा बेलबारी साहित्य विकास समितिका अध्यक्ष रमेश निरौलाको सञ्चालन रहेको सो कार्यक्रमको सञ्चालन कोषाध्यक्ष शिव पराजुलीले गर्नुभएको थियो ।
