धनवीर पुनमगर/गोविन्दकुमार शर्मा, काठमाडौँ ।
राष्ट्रिय जनमोर्चाका केन्द्रीय सल्लाहकार आनन्द शर्माले देशको राष्ट्रियता रहने कि नरहनेजस्तो गम्भीर अवस्था उत्पन्न भएको बताउनुभएको छ ।
२०८२ मङ्सिर २७ गते शनिबार कलङ्कीचोकमा आयोजित विरोधसभालाई सम्बोधन गर्दै उहाँले सो विश्लेषण अगाडि सार्नुभएको हो ।
उहाँले भन्नुभयो– ‘देशको राष्ट्रियता रहने कि नरहने अत्यन्तै गम्भीर अवस्था उत्पन्न भएको छ ।’
गत भदौ २३–२४ आन्दोलनको सञ्चालनकर्ता विदेशी शक्तिकेन्द्र रहेको बताउँदै उहाँले यही कारणले राष्ट्रियता गम्भीर अवस्थमा पुगेको बताउनुभयो ।
‘राज्यका सबै निकाय सेटिङमा चलेको देखिन्छ’ उहाँले भन्नुभयो– ‘साम्राज्यवादी घुसपैठका कारण जेनजी आन्दोलन साच्चिकै सुशासनको पक्षमा थियो या नेपालमा नयाँ जेलेन्स्की बनाउने कोसिस थियो भन्ने आशङ्का पैदा भएको छ ।’
भ्रष्टाचारका कारण देशमा गम्भीर स्थिति उत्पन्न भएको बताउँदै उहाँले सङ्घीयताका कारणसमेत भ्रष्टाचार अरू गम्भीर बनेको उहाँको भनाइ थियो ।
मन्तव्यको क्रममा उहाँले राष्ट्रिय जनमोर्चा मात्रै भ्रष्टाचारको विरुद्ध निरन्तर सङ्घर्षशील शक्ति रहेको बताउनुभयो ।
भ्रष्टाचार निर्मूल नभए देशको राष्ट्रियतासमेत खतरामा परिरहने उहाँको भनाइ थियो ।
त्यस्तै, नेपालको विशिष्ट भौगोलिक अवस्थितिका कारण पनि देशको राष्ट्रियता खतरामा परेको उहाँको अर्को तर्क थियो ।
फरक प्रसङ्गमा उहाँले फागुन २१ गते प्रतिनिधिसभा चुनावको मिति घोषणा हुन्छ वा हुन्न भन्न नसकिने स्थिति रहेको बताउनुभयो ।
‘चुनाव घोषणा भए तापनि तोकिएको समयमा हुन्छ वा हुँदैन ? निश्चित छैन’ उहाँले भन्नुभयो– ‘तर तोकिएको मितिमा चुनाव हुनुपर्दछ अन्यथा संसद् पुन:स्थापना हुनुपर्दछ ।’
त्यस्तै, राजमो केन्द्रीय सदस्य लालबहादुर थापाले मन्तव्य राख्दै जेनजी आन्दोलनको आवरणमा नेपालको राष्ट्रियता विघटन गराउने प्रयास भइरहेको बताउनुभयो ।
उहाँले राष्टविरोधी यस्तो खतराका विरुद्ध सम्पूर्ण देशभक्त शक्तिहरू एकजुट हुनुपर्ने बताउनुभयो ।
नेकपा (मसाल) काठमाडौँका प्रवक्ता जगत्प्रसाद रेग्मीले राजनीतिक दलको सत्ता दुरुपयोगले गर्दा जेनजी आन्दोलन उठेको धारणा राख्नुभयो ।
उहाँका अनुसार सत्तारूढ दलको लुटका विरुद्ध जेनजी आन्दोलन उठेको थियो तर त्यसलाई साम्राज्यवादले हाइज्याक गरेका थिए ।
राजमो काठमाडौँका सचिव छवि खनालको अध्यक्षतामा सुरु भएको उक्त कार्यक्रमको सञ्चालन जातीय समता समाजका केन्द्रीय सदस्य भक्त विश्वकर्माले गर्नुभएको थियो । 
