प्रकाश थापामगर/गोविन्दकुमार शर्मा, काठमाडौँ ।
बुढानीलकण्ठ नगरपालिका वडा नं. १० स्थित नगर अस्पतालमा प्रसूति सेवा उद्घाटन भएको छ ।
बागमती प्रदेशका पूर्व भौतिक पूर्वाधार तथा यातायातमन्त्री अमनकुमार मास्केले २०८२ मङ्सिर २२ गते सोमबार आयोजित एक औपचारिक कार्यक्रममाझ सो सेवाको उद्घाटन गर्नुभएको हो ।
प्रसूति वार्डको उद्घाटनपछि सङ्क्षिप्त मन्तव्य राख्दै उहाँले मातृस्वास्थ्य तला बालस्वास्थ्य मानव समाजको महŒवपूर्ण पक्ष भएको बताउनुभयो ।
स्वास्थ्य सेवाको प्र्रत्याभूतिमा स्वास्थ्यकर्मीको सेवाको उच्च मूल्याङ्कन गर्दै उहाँले अन्य कर्मचारीलाई भन्दा उनीहरूलाई बढी सेवासुविधा दिनुपर्ने माग गर्नुभयो ।
कार्यक्रममा मन्तव्य राख्दै बागमती प्रदेशसभाकी सांसद मीना पराजुलीले पनि स्वास्थ्य क्षेत्रमा उल्लेख्य काम हुनु समाजकै लागि राम्रो भएको बताउनुभयो ।
नगरप्रमुख मिठाराम अधिकारीको अध्यक्षता तथा नगर उपप्रमुख अनिता लामाको स्वागत मन्तव्यसँगै अघि बढेको उक्त कार्यक्रमको सञ्चालन मीनराज खड्काले गर्नुभएको थियो ।
लोकगायिकका राधिका ढकालले गीतमार्फत कार्यक्रममा स्वागत गर्नुभएको थियो ।
सो अवसरमा अस्पताल प्रमुख सुधांशु झा, १० नम्बर वडाका अध्यक्ष नवराज भट्टराईसँगै विभिन्न पालिकाका जनप्रतिनिधि, कर्मचारी तथा स्वास्थ्य कर्मचारीको उल्लेख्य सहभागिता रहेको थियो ।
कार्यक्रममा अस्पतालका प्रमुख कार्यकारी अधिकृत गोपालप्रसाद पोखरेल अस्पतालको बारेमा जानकारी गराउनुभएको थियो ।
पोखरेलका अनुसार नगर अस्पताल २०८१ वैशाख १ गते सुरु भएको थियो । सोही साल भदौ १ गतेदेखि अस्पतालमा स्वास्थ्य बिमाको कार्यक्रम सुरु भएको थियो ।
दैनिक २०० सेवाग्राहीले सेवा लिने गरेको उक्त अस्पतालमा हालसम्म ३९ हजार आठ सय ४३ जनाले अस्पतालको सेवा लिएको उहाँले बताउनुभयो ।
हाल ७१ जना स्वास्थ्यकर्मीको दरबन्दी रहेको सो अस्पतालले चालु आव २०८२/८३ को हालसम्म एक करोड ८० लाख ९९ हजार तीन सय ५७ रुपियाँ आम्दानी गरेको पोखरेलले जानकारी दिनुभयो ।
आज उद्घाटन भएको प्रसूति सेवामा १५ सैया रहेको छ ।
