काठमाडौं । रुकुम पश्चिमको आठबिसकोट नगरपालिकामा एक महिलामाथि ३/४ जना पुरुष प्रहरीद्वारा कुटपिट भएको भिडियो यतिबेला सामाजिक सञ्जालमा भाइरल भएको छ ।

गत जेठ १ गते बगरकोटमा रहेको हेल्थ डेस्कमा २१ वर्षीया स्नेहा विष्टमाथि नगर प्रहरी र नेपाल प्रहरीका जवानहरुले कुटपिट गरेको भिडियो सामाजिक सञ्जालमा भाइरल बनेको हो ।

प्रहरीका अनुसार मदिरा सेवन गरेकी ति महिलाले हेल्थडेस्कमा खटिएकी स्वास्थ्यकर्मी डोल्मा मल्ललाई गालीगलौज गर्नुका साथै हेल्थ डेस्कको डोरी चुँडालेकी थिइन् । प्रहरीले सम्झाइ बुझाई गर्दा नमानेपछि नियन्त्रणमा लिएको प्रहरीले जनाएको छ ।

सामाजिक सञ्जालमा राखिएको सो भिडियोमा ति महिलामाथि एक महिला नगर प्रहरी र ३/४ जना पुरुष प्रहरीले समातेर पाइपबाट पानीले भिजाउनुका साथै लौरी र हातले कुटपिट गरेको देखिन्छ । त्यहाँबाट जान लागेकी उनलाई गेटबाट पुनः पुरुष प्रहरीले नै समातेर ल्याएको भिडियोमा देख्न सकिन्छ ।

सामाजिक सञ्जालमा भिडियो भाइरल भएपछि घटनाबारे रुकुम प्रहरीले छनविन सुरु गरेको छ । बुधबार विज्ञप्ति प्रकाशित गरी जिल्ला प्रहरी कार्यालय रुकुमले घटनाबारे छानबिन सुरु गरिएको जनाएको छ ।

https://www.facebook.com/111107043602906/videos/2951302791592203/?t=0