काठमाडौँ । वंश–रत्न मानववादी सम्मान–२०८२ ‘आमाको घर’ की दिलशोभा श्रेष्ठलाई दिइने भएको छ ।
वंश–रत्न मेमोरियल ट्रस्टले हरेक दुई वर्षमा प्रदान गर्ने सो सम्मानको चौथो संस्करण सो संस्थाकी संस्थापक एवम् प्रमुख संरक्षक श्रेष्ठलाई प्रदान गरिने भएको हो ।
सीमाविद बुद्धिनारायण श्रेष्ठ प्रमुख आतिथ्यमा २०८२ कात्तिक २९ गते शनिबार नेपाल प्रज्ञा–प्रतिष्ठानको पारिजात कक्षमा आयोजित एक कार्यक्रममार्फत सो घोषणा गरिएको थियो
कार्यक्रमको सञ्चालन ह्युमनिस्ट इन्टरनेसनलका एसिया एम्बेसडर उत्तम निरौलाले, अध्यक्षता ट्रस्टकी अध्यक्ष सन्तकुमारी श्रेष्ठले तथा स्वागत मन्तव्य संस्थाकी सचिव अमिता श्रेष्ठले राख्नुभएको थियो ।
सम्मानित व्यक्तित्व दिलशोभाको सङ्क्षिप्त परिचय स्रष्टा एवम् अभियन्ता रामदेव पाण्डेले दिनुभएको थियो ।
कार्यक्रममा बागलुङ समाज कल्याण केन्द्रका अध्यक्ष डा. स्वयम्प्रकाश श्रेष्ठ, डा. नीलप्रसाद पन्त, नोर्बु घले, समाजसेवी गङ्गा कसजू, रेणु जोशी र मदनराज थापासमेतले शुभकामना मन्तव्य राख्नुभएको थियो ।
आयोजक संस्थाका अनुसार नेपालमा पहिलोपटक देशविदेशका माननववादी व्यक्तित्व, संस्था तथा कृतिलाई मानववादी सम्मान तथा पुरस्कार प्रदान गर्ने गरी सुरु गरिएको यस सम्मामनबाट यसअघि तीन जना व्यक्तित्वलाई सम्मान गरिसकिएको छ ।
‘अन्धविश्वास र कुरीति विरुद्ध मानववादी अभियान’ मूल नारा बोकेको ट्रस्टले प्र्रदान गर्ने पुरस्कार तथा सम्मान सुरुका तीन संस्करण प्रत्येक वर्ष प्रदान गरिए पनि २०८० पछि ट्रस्टले निर्णय गरी हरेक दुई वर्षमा सम्मान प्रदान गर्ने निर्णय गरेको थियो ।
२०७८ सालको सम्मान दार्शनिक व्यक्तित्व मोहनविक्रम सिंहलाई, २०७९ सालको सम्मान विश्लेषक शाम श्रेष्ठ र २०८० को सम्मान अभियन्ता भारतीय नागरिक प्राडा नरेन्द्र नायकलाई २०८० मा एकमुष्ट प्रदान गरिएको थियो ।
स्रष्टा, अनुवादक एवम् समाजसेवी व्यक्तित्व बालकृष्ण श्रेष्ठ नेभाले आफ्ना स्मृतिशेष बुबाआमाको सम्मान र सम्झनामा स्थापना गरेको आयोजकले बताएको छ ।
