काठमाडौं । चार दशक भन्दा बढी समय देखि रंगमञ्च, चलचित्र तथा सामाजिक सेवामा सकृय रहेएका विशिष्ट हाँस्य कलाकार मदनकृष्ण श्रेष्ठ, हरिवंश आचार्य (महजोडी) लाई चैत्य देवी सिंह पुरस्कार प्रदान गरिने भएको छ ।
भुवन चैत्य बसुन्धरा फाउण्डेशनकी अध्यक्ष वरिष्ठ कलाकार बसुन्धरा भुसालको अध्यक्षतामा बसेको बैठकले कलाकार द्वयलाई सो पुरस्कार प्रदान गर्ने निर्णय गरेको हो ।
यस्तै, फाउण्डेशनले नेपाली रंगमञ्च तथा चलचित्र क्षेत्रमा ६ दशक भन्दा बढी समय देखि कार्यरत विशिष्ट नृत्य निर्देशक भैरव बहादुर थापालाई हरिश भुवनचन्द पुरस्कार प्रदान गर्ने निर्णय गरेको छ।
यसैगरी चेतनारायण बसुन्धरा भूसाल पुरस्कार ५ दशक भन्दा बढी समय देखि रंगमञ्च तथा चलचित्रमा कार्यरत विशिष्ट अभिनेत्री सकुन्तला शर्मालाई प्रदान गर्ने निर्णय गरेको छ।
प्रत्येक पुरस्कारको रकम एकाउन्न हजार राशीको रहेको छ । अघिल्लो वर्षको तीनवटै पुरस्कार चलचित्र विकास बोर्ड अन्तर्गतको चलचित्रकर्मी कल्याणकारी कोषलाई एक लाख त्रिपन्न हजार प्रदान गरिएको फाउण्डेसनले जनाएको छ ।
