क्वालालम्पुर । गत हप्तादेखि निरन्तर परेको भारी वर्षाले बोर्नियो टापुको सबाह राज्यमा भूस्खलन हुँदा कम्तीमा १२ जनाको मृत्यु भएको समाचार मङ्गलबार सार्वजनिक भएको छ ।
हालैका बाढीका कारण राजधानी कोटा किनाबालु वरपरका तल्लो क्षेत्रमा बसोबास गर्ने दुई हजारभन्दा बढी व्यक्तिलाई सुरक्षित स्थानमा सारिएको उद्धार अधिकारीहरूले जनाएका छन् ।
सबैभन्दा भीषण घटना सोमबार भयो । सोमबार राजधानीको बाहिरी क्षेत्रमा रहेको अनौपचारिक बस्तीमा भग्नावशेष ठोक्किँदा चार बालबालिका सहित आठ जनाको ज्यान गएको न्यु स्ट्रेट्स टाइम्सले उल्लेख गरेको छ ।
सोही दिन कोटा किनाबालुबाट करिब एक सय किलोमिटर पूर्वमा रहेको गानामा अर्को भूस्खलन हुँदा १० वर्षीया बालिकासहित तीन जनाको मृत्यु भयो । गत हप्तामा पेनामपाङमा ९७ वर्षीय वृद्धलाई माटोले गाडेको घटनामा ज्यान गएको थियो ।
लगातार १० दिनदेखि परेको वर्षाले सबाहका तल्लो क्षेत्रमा बाढी ल्याउनुका साथै भूस्खलन, घर र पूर्वाधारमा ठूलो क्षति पु¥याएको छ । मलेसियाको सबैभन्दा गरिब राज्य मानिने सबाह विशेषगरी नोभेम्बरदेखि मार्चको मनसुनमा नियमित रूपमा बाढीको जोखिममा पर्ने गर्छ ।
मलेसियाका उपप्रधानमन्त्री अहमद जहिद अमिदीले सोमबार राति खोजी तथा उद्धार कार्यमा सहयोग गर्न दक्षिणपूर्वी एसियाली देशका विभिन्न प्रतिक्रिया एजेन्सीहरूलाई परिचालन गरेका गर्नुभएको छ । सबाह सरकारले विपत्तिका कारण यस वर्षको मलेसिया दिवस समारोह पनि रद्द गरेको छ ।
वर्षा केही कम भए पनि थप वर्षाले अवस्था फेरि बिग्रन सक्ने चिन्ता स्थानीय बासिन्दाले व्यक्त गरेका छन् । “घरमा बाढी र माटोको सामना गर्नुपर्दा हामी शान्त रहन प्रयास गरिरहेका छौँ”, ४४ वर्षीय ओलिभर गोलिङ्गाईले द स्टार दैनिकलाई भन्नुभयो, “मसँग कुनै पनि मलेसिया दिवस समारोहबारे सोच्ने समय छैन । अहिले ध्यान त केवल बाढीसँग जुध्न र घर वरिपरि थुप्रिएको माटो सफा गर्नमै छ ।”
