काठमाडौं । कतारमा आममाफी पाएका ४३ नेपाली कामदार स्वदेश फर्किएका छन् । शुक्रबार कतार एयरवेजको जहाजमार्फत उनीहरु काठमाडौं आइपुगेका हुन् ।
ति नेपालीलाई कतारले आफ्नै खर्चमा नेपाल पठाएको जनाइएको छ । सोही जहाजमा कतारमा लकडाउन को अवधिमा मृत्यु भएका २० नेपालीको शव ल्याइएको त्रिभुवन अन्तर्राष्ट्रिय विमानस्थलले जनाएको छ ।
शनिबार नै हिमालय एयरलाइन्सबाट कुवेत तथा माल्दिभ्सबाट एक/एक नेपालीको शव पनि ल्याइएको छ । यस्तै नेपाल एयरलाइन्सले दुबईबाट एक शव ल्याएको थियो। जजिरा एयरलाइन्सले कुबेतबाट दुई शव ल्याएको थियो।
शनिबार पनि नेपाल एयरलाइन्स र हिमालय एयरलाइन्सले चार्टर्ड उडान गर्दैछन् भने विदेशी एयरलाइन्सले पनि उडान भर्ने जनाइएको छ।
अन्तर्राष्ट्रिय विमानस्थलमा शनिबार अन्तर्राष्ट्रियतर्फ तीन कार्गोसहित नौ र आन्तरिकतर्फ पाँच चार्टर्ड तथा कार्गो उडान भइ सम्भवतः लकडाउनपछिको सबैभन्दा धेरै उडान भएको विमानस्थलले जनाएको छ ।
सरकारले विभिन्न मुलुकमा अलपत्र परेका करिब ३० हजार नेपाली जहाज चार्टर्ड गरेर ल्याउने निर्णय गरेसँगै नेपालका तर्फबाट नेपाल वायु सेवा निगम (नेपाल एयरलाइन्स) र हिमालय एयरलाइन्सले उद्धार उडान गरी नेपाली ल्याइरहेका छन् । यस्तै, जजिरा एयर, कतार एयरवेज, इटाली एयरलाइन्सले पनि विदेशबाट नेपाली ल्याइरहेका छन् ।
