पोखरा । गण्डकी प्रदेश सांसद पियारी थापाले प्रदेश सरकारले प्रस्तुत गरेको बजेटलाई बच्चाको हात बाँधेर अगाडि झुण्ड्याएको सुन्तला मिठाईसँग तुलना गर्नुभएको छ ।
राष्ट्रिय जनमोर्चाका सांसद थापाले प्रदेशसभामा आगामी आर्थिक वर्षको बजेटमाथिको छलफलमा भाग लिँदै बजेटलाई ‘सुन्तला मिठाई’ बताउनुभएको हो ।
सांसद थापाले भन्नुभयो, ‘कोरोना महामारीको संघारमा सरकारले ल्याएको बजेटमा छलफल गर्दा के अनुभुति गरेको छु भने धागोले बाँधेर राखेका सुन्तला मिठाईको रसास्वादन गर्नका निम्ति हात बाँधिएका भोका जनता अगाडि बढिरहेका छन् । त्यो रसास्वादन गर्न कतिले पाए, कतिले पाएनन् । पाएको भए पनि भोक प्यास मेटिएन । अहिलेको बजेटलाई त्यो सुन्तला मिठाई संग दाजेको छु ।’
उहाँले योजना छनौटमा अदुरदर्शिता र हेलचक्राईँ देखाएको आरोप लगाउनुभयो स्थानीय तहहरुसँग छलफल नगरी ल्याइएका योजना प्रभावकारी नहुने उहाँको धारणा थियो । सांसद थापाले कोरोना संक्रमण भयावह बनिरहेको अवस्थामा त्यसलाई नियन्त्रण गर्ने गरी बजेट आउन नसकेको बताउनुभयो ।
‘कोरोना नियन्त्रण र उपचारकालागि बिनियोजन गरेको बजेट खर्चको हिसाबले हेर्ने हो भने प्रर्याप्त छैन । कोरोना पछिको प्रदेशबासीहरुको भविश्य, यसबाट संक्रमण र सम्पुर्ण मजदुरवर्ग, किसानवर्ग, विद्यार्थी, साना उद्योग, व्यवसायी र उद्योग व्यापारहरुको व्यवस्थापन र उनीहरुको जिवन रक्षा गर्न छुत्याइएको बजेट सम्भाव छैन । सामान्य उपचार बाहेक बिशेष उपचार गर्ने बजेट छैन’ उहाँले भन्नुभयो ।
उहाँले स्थानीय तह सक्रिय भएको अवस्थामा सांसदलाई विकासका नाममा बजेट दिनु अव्यवहारिक हुने बताउनुभयो । साथै उत्त रकम महामारी कोषमा राखेर जीवन रक्षा कार्यमा खर्च गर्नुपर्ने थापाले बताउनुभयो । सो सम्बन्धी खर्च एकद्वार प्रणालीबाट गरिनु पर्ने र पारदर्शी हुनुपर्ने थापाको सुझाव छ ।
