काठमाडौँ । बौद्ध पुरातात्विक बृहत् विचारगोष्ठी आगामी २०८३ साल वैशाखको १०, ११ र १२ गते काठमाडौँमा र जेठ ९ र १० गते लुम्बिनीमा आयोजना गरिएको छ ।
महासचिव घनश्याम न्यौपानेको हस्ताक्षरमा २०८२ भदौ १७ गते मङ्गलबार जारी प्रेसविज्ञप्तिमा सो जानकारी दिइएको हो ।
बैठकले बौद्ध पुरातात्त्विक सहर निर्माण अभियानको पदाधिकारीको जिम्मेवारी किटान गरेको छ । सोअनुसार अध्यक्षमा दुर्गा पौडेल, उपाध्यक्षमा बद्रे आलम, महासचिवमा घनश्याम न्यौपाने र कोषाध्यक्षमा तारा थापा रहनुभएको छ ।
त्यस्तै सचिवालयमा अध्यक्ष पौडेल, उपाध्यक्ष आलम र महासचिव न्यौपाने रहनुहुने जानकारी दिइएको छ ।
यस्तो छ, प्रेसविज्ञप्तिको पूर्ण पाठ :
“यही २०८२ भदौ १६ गते बौद्ध पुरातात्त्विक सहर निर्माण अभियानको बैठक बुटवलमा बस्यो । त्यो बैठकले गरेका निर्णयको जानकारी गराउन यो वक्तव्य जारी गरिएको छ ।
१. आगामी २०८२ वैशाख १०, ११ र १२ गते काठमाडौँमा बौद्ध पुरातात्त्विक सहरबारे बृहत् विचारगोष्ठी गर्ने निर्णय गरेको छ । त्यही विषयमा जेठ ९ र १० गते लुम्बिनीमा अन्तरक्रिया पनि गर्ने निर्णय भएको छ ।
२. उक्त समितिलाई छिट्टै दर्ता गर्ने निर्णय गरिएको छ ।
३. समितिले संस्थाका पदाधिकारीहरूमा अध्यक्ष दुर्गा पौडेल, उपाध्यक्षमा बद्रे आलम, महासचिवमा घनश्याम न्यौपाने र कोषाध्यक्षमा तारा थापालाई मनोनित गरेको छ ।
४. समितिले तीन जनाको कार्यालय पनि ठेगान गरेको छ, जसमा अध्यक्ष दुर्गा पौडेल, उपाध्यक्ष बद्रे आलम र महासचिव घनश्याम न्यौपाने हुनुहुन्छ ।
५. बैठकले उक्त कार्यक्रमलाई सफल पार्नका लागि आवश्यक आर्थिक सङ्कलन गर्नका लागि पहलकदमी गर्ने निर्णय पनि गरेको छ ।”
