काठमाडौं । वैदेशिक रोजगारीका लागि साइप्रस पुगेका नेपालीहरु संगठित भएका छन् । अन्तर्राष्ट्रिय नेपाली एकता समाजको आह्वानमा साइप्रसका नेपालीहरुले ‘साइप्रस नेपाली एकता समाज’ को गठन गरेका हुन् ।

जुन १३ मा भएको एक भेलाले देवेन थापाको संयोजकत्वमा २७ सदस्यीय भेला आयोजक समिति गठन गरेको अन्तर्राष्ट्रिय नेपाली एकता समाजका सल्लाहकार धनबीर पुनले युगदर्शनलाई जानकारी दिनुभयो ।

समितिका सदस्यहरुमा मन्जु लिम्बु (मोरङ), सम्पदा कार्की (उदयपुर), विन्दु खड्का (बांके), नबराज खत्री (प्यूठान), राज बहादुर चौधरी (बर्दिया), इश्वर घर्ति (दाङ), खिमान थापा (दाङ), चन्द्र ओली (दाङ), अनिल कुँवर (अर्घाखाँची), शालिकराम घर्ति मगर (दाङ), सरिता सेन ठकुरी (रुपन्देही), मनोज पन्त (रुपन्देही), टंक बहादुर पुन (प्यूठान), दिल मगर (गुल्मी), पूर्णीमा तमाङ (कास्की), तारा मास्कील (सिन्धुपालचोक), ल्होमे नानु गुरुङ (स्याङजा), कृष्णा राई (धरान), कामना शाह (अर्घाखाँची), विनोद केसी (दाङ), सुनिल विक (रोल्पा), यमी मगर (रुपन्देही), रिता क्षेत्री (बाग्लुङ), जिवराज पोखरेल (दाङ), महेन्द्र सुनार (प्यूठान) र विष्णु पुन (रुपन्देही) रहनु भएको छ ।

सो अनलाइन भेलामा अन्तर्राष्ट्रिय नेपाली एकता समाजका सचिवालय सदस्य ठाकुर खनालको प्रमुख आतित्थ्यता रहेको थियो भने सल्लाहकार धनवीर पुन मगरको आतिथ्यता रहेको थियो ।

कार्यक्रमलाई सम्बोधन गर्दै खनालले विश्वका विभिन्न देशहरु आ–आफ्ना औद्योगिक प्रोडक्टहरु विश्वका कुना कुनामा पुर्याएर नामी र सम्पन्न बनिरहेको परिवेशमा हामी श्रमिक सप्लाई गर्ने देशको रुपमा चिनिनु पर्दा अत्यन्तै दुःखको महसुस हुने बताउनुभयो ।

‘तर सत्य यहि हो । यसो हुनुमा हाम्रो देशको राज्यव्यवस्था नै प्रमुख दोषी छ’ खनालले भन्नु भयो– ‘जबसम्म देशमा श्रमजीवी वर्गको राज्य व्यवस्था आउँदैन, त्यतिवेलासम्म हामी नेपाली श्रमजिवीहरुको जीवन नै संघर्षपूर्ण छ ।’

देशमा कम्तिमा ज्यालामा काम पाउने बातावरण पनि नहुँदा लाखौं युवा शक्ति विदेश पलायन हुनुपर्ने बाध्यात्मक अवस्था रहेको खनालले बताउनुभयो । तर, विदेशमा रगत पसिना बगाइरहेका श्रमजीवीप्रति राज्यले वेवास्ता गरिरहेको खनालले बताउनुभयो ।

‘अहिले कैयौं युवाहरु विश्वका विभिन्न मुलुकहरुमा अलपत्र अवस्थामा छन्, उनीहरुलाई उद्धार गर्ने सवालमा समेत राज्य आफै अलमलमा परेको छ’ खनालले भननुभयो, ‘तर विभिन्न देशहरुबाट नेपाली नागरिकहरुलाई उद्धारको नाममा स्वयं सरकारले नै असिमित भाडा तय गरेर अघोषित रुपमा लुटने कोशिस गरेको छ ।’

सो कार्यक्रमको अध्यक्षता विन्दु खड्काले गर्नुभएको थियो भने, सञ्चालन देवेन थापाले गर्नुभएको थियो । कार्यक्रममा मन्जु लिम्बुले स्वागत गर्नुभएको थियो । भेलामा धनवीर पुन मगरले शुभकामना दिनुभएको थियो ।

समाजको प्रथम भेला छिट्टै सम्पन्न गरिने संयोजक थापाले बताउनुभएको छ । सोही भेलामा नयाँ पदाधिकारीहरु चयन गरिने र विभिन्न जिम्माको बाँडफाँड गरिने छ । भेला भन्दा पहिला आयोजक समितिले घोषणा पत्र तथा विधान, झण्डा, सदस्यता प्रमाण पत्र लगायतका कार्यहरु सम्पन्न पार्नका लागि आपसी सहकार्य चलिरहेको समेत संयोजक थापाले बताउनु भयो ।