काठमाडौँ । अखिल (छैठौं) ले प्रधानमन्त्री अध्यक्ष रहनुभएको चिकित्सा शिक्षा आयोगले निजी मेडिकल कलेजका लागि एमबिबिएस कोटामा वृद्धि गरेको विरोधमा प्रदर्शन गर्ने भएको छ ।
अध्यक्ष सुवास जिसीद्वारा २०८२ साउन ३१ गते शनिबार जारी प्रेसवक्तव्यमा आजै साँझ काठमाडौँमा प्रदर्शन गर्ने जानकारी दिइएको हो ।
चिकित्सा आयोगले हालै एक हजार तीन सय ५९ सिट एमबिबिएसलगायतका लागि छुट्याइएकोमा वक्तव्यमा सरकारको शैक्षिक माफियासँगको सम्झौताको रूपमा लिइएको छ ।
सरकारी मेडिकल कलेजको कोटामा वृद्धि नगरीकन निजी मेडिकल कलेजलाई मात्रै पोस्ने काम भएकाले सोको विरोधमा विरोध प्रदर्शन आयोजना गरेको अखिल (छैठौं) को दाबी छ ।
यस्तो छ, प्रेसवक्तव्यको पूर्ण पाठ :
“प्रधानमन्त्री केपी शर्मा ओली अध्यक्ष रहेको चिकित्सा शिक्षा आयोगको निर्णयले निजी मेडिकल कलेजमा एमबिबिएसलगायतका सिटमा १,३५९ जनाको सिट सङ्ख्या वृद्धि गरिएकोप्रति हाम्रो सङ्गठनको गम्भीर ध्यानाकर्षण भएको छ ।
विगतका कैयौँ सहमतिको उल्लङ्घन गर्दै एमबिबिएस, बिडिएस, बिफार्म र बिपिएचलगाएतका थुप्रै कार्यविधि, नियम र विनियम विपरीत निजी कलेजहाई कोटा थप गरिएको छ । अत्यन्तै लज्जास्पद विषय त के छ भने त्यति ठुलो सङ्ख्यामा निजी कलेजको कोटा वृद्धि गरिँदा सरकारी मेडिकल कलेजमा एक सिट पनि थप गरिएको छैन । यसले ओलीको शैक्षिक माफियासँग कुन प्रकारको गठजोड छ र उनीहरूसँग कुन हदसम्मको सम्झौता गर्छन् भन्ने कुरा स्पष्ट गर्दछ ।
ओलीको निर्देशनमा भएको यस प्रकारको निर्णयले मेडिकल क्षेत्रमा लुट मच्चाउने र माफिया पोस्ने कार्यमा मात्र सहयोग गर्नेछ । मेडिकल कलेजका कैयौँ समस्या विद्यमान छन् । निजी कलेजको लुटमा कुनै कमी आएको छैन । त्यसलाई नियन्त्रण गर्ने, नियमन गर्ने र मेडिकल शिक्षालाई गुणस्तरीय वनाउनुको साटो थप निजीकरण र व्यापारीकरणको दिशामा धकेल्नु गम्भीर विषय हो।
हामीले प्रधानमन्त्रीको निर्देशनमा भएको यस प्रकारको माफियागिरीको घोर विरोध गर्दछौँ र तत्काल यो निर्णय खारेज गर्न अनुरोध गर्दछौँ, साथै आयोगको यो निर्णय विरुद्ध आज साँझ (साउन ३१ गते) ५ बजे शान्तिवाटिकामा प्रदर्शन गर्ने घोषणा गर्दछौँ ।”
