काठमाडौं । मूल प्रवाह अखिल भारत नेपाली एकता समाजले नेपालमा अमेरिकी सहयोग मिलेनियम च्यालेन्ज कर्पोरेसन (एमसीसी) विरुद्व चलिरहेको आन्दोलनप्रति ऐक्यवद्वता प्रकट गरेको छ ।

विहिबार अध्यक्ष दुर्गाबहादुर केसीले एक वक्तव्य प्रकाशित गरी एमसीसी खारेजीको माग गर्नुभएको छ ।  नेपालमा नेकपा(मसाल),राष्ट्रिय जनमोर्चा लगायत राजनीतिक दलहरुले एमसीसी खारेजीको माग गर्दै आन्दोलन गरिरहेका छन् ।

एमसीसी सम्झौता संसदबाट अनुमोदन गर्न अहिले संसदमा विचाराधिन छ । त्यसप्रति सत्तारुढदल नेकपाकै कतिपय सांसदहरुको असहमति रहेको छ ।

यस्तो छ वक्तव्यः
‘यति वेला मिल्लेनियम च्यालेन्ज कर्पोरेशन (Millennium Challenge Corporation) विरुद्ध नेपाली जनता सड्कमा ओर्लिएका छन् । नेपाल र नेपाली जनताको पक्षमा नेपाली जनताद्वारा गरिएको एमसिसि विरुद्धको आन्दोलनप्रति मूल प्रवाह अखिल भारत नेपाली एकता समाज ऐक्यवद्धता प्रकट गर्दछ ।

एमसिसिको विषयमा नेपाली राजनैतिक दलहरु दुई कित्तामा बाँडिएका छन्, एकथरि पास गराउने र अर्को थरि खारेज गराउने । केही व्यक्ति वा राजनीति दलहरु एमसिसिले दिने अनुदानलाई मात्रै निकै महत्व दिइरहेका छन् तर त्यसले भविष्यमा देशमाथि पर्ने नकारात्मक असर वा परिणामको बारे ध्यान दिएका छैनन् । देशभक्त जनतान्त्रिक शक्तिहरुले एमसिसि नेपालमा भित्रिएमा नेपाल विदेशीको रणभूमिको रुपमा साम्राज्यवादी शक्तिहरुबाट उपयोग हुने र नेपाल ध्वस्त हुने तर्क सहित आन्दोलनमा छन्, नीतिगत रुपमा र व्यवहारतः पनि सत्य यहि हो ।

केही व्यक्तिहरुले भने मध्यमार्गी बाटो अपनाउने कोशिस गरिरहेका छन्, उनीहरुले आंशिक संशोधन सहित पास गर्नु पर्ने तर्क पनि ल्याएका छन् । जुन संशोधन सहित पास गर्ने कुरा छ, त्यो कुरा एमसिसि विरुद्धको आन्दोलनलाई दिशा विहिन बनाउने र अमेरिकी साम्राज्यवादको वफादार बनिरहन गरिएको प्रयत्न बाहेक अरु केही होइन ।

एमसिसि अमेरिकाको सैन्य रणनीति हिन्द प्रशान्त रणनीति (­Indo-Pacific Strategy)कै अभिन्न अंगको रुपमा नै अगाडि सारिएको हो भन्ने प्रमाणित र स्पष्ट भैसकेको छ । अमेरिकाले आफ्नो प्रतिपर्धी देशलाई घेर्नको निम्ती नेपाली भूमिलाई प्रयोग गर्ने प्रयत्नमा नेपाल सामेल हुनु नेपालको हित विपरित र नेपालको असंगलग्न परराष्ट्र नीतिको पनि विरुद्ध छ । एमसिसिले दिने अनुदान भन्दा राष्ट्रहित सर्वोपरि छ । त्यसैले एमसिसिलाई कुनै पनि हालतमा पारित गरिनु हुँदैन, त्यसलाई खारेज गर्नु पर्दछ ।

अन्तमाः हामीले नेपालमा राष्ट्रिय जनमोर्चा, नेकपा (मसाल) लगायत १० दलको संयुक्त आन्दोलन, राष्ट्रियताको पक्षमा विभिन्न संघसंस्था एवं आम नेपाली जनाताले चलाएको आन्दोलनलाई भारतस्थित नेपालीहरुको तर्फबाट ऐक्यवद्धता प्रकट गर्दछौं ।’