काठमाडौं । इजरायल, इरान र अमेरिकाबिच हाल उत्पन्न भएको युद्धप्रति प्रगतिशील लेखक संघ, नेपालको गम्भीर ध्यानाकर्षण भएको जनाउँदै अरू राष्ट्रको निःशस्त्रीकरणका नाममा युद्ध थोपर्ने कार्य पूर्णतः अन्यायपूर्ण भएको बताएको छ ।
‘यथार्थमा इजरायल र अमेरिका स्वयं आणविक हतियारसम्पन्न राष्ट्रहरू हुन् ।’ विज्ञप्तीमा उल्लेख छ, ‘यसरी आफूसँग आणविक हतियार राख्दै अरू राष्ट्रको निःशस्त्रीकरणका नाममा युद्ध थोपर्ने कार्य पूर्णतः अन्यायपूर्ण, आत्मकेन्द्रित र दादागिरीपूर्ण कार्य हो ।’
‘गाजामाथि इजरायलद्वारा गरिएको सामूहिक नरसंहारको विरोधमा इरानले स्पष्ट र दृढ आवाज उठाएको थियो ।’ लेखक संघद्धारा जारि विज्ञप्तीमा लेखिएको छ, ‘सोही विरोधको बदलास्वरूप इजरायलले अमेरिकाको सहयोगमा इरानमाथि सशस्त्र आक्रमण गरेको तथ्य अहिले विश्वसामु प्रकट भइसकेको छ ।’
संयुक्त राष्ट्रसंघको बडापत्र, पञ्चशील सिद्धान्त र अन्तर्राष्ट्रिय कानुनहरूको पूर्ण पालना गर्दै, समस्याहरूको शान्तिपूर्ण समाधान खोजिनु पर्नेमा लेखक संघले विज्ञप्तीमा जोड दिएको छ । त्यस्तै इरान र इजरायलमा रहेका नेपाली नागरिकहरूको सुरक्षाका लागि नेपाल सरकारले यथाशक्य चाँडो प्रभावकारी पहल गर्नुपर्नेमा लेखक संघको आग्रह रहेको छ ।