काठमाडौँ । विश्वस्तरमा अमेरिकी साम्राज्यवादले आफ्नो हस्तक्षेकारी गतिविधि निरन्तर अगाडि बढाईरहेको छ । यसै सन्दर्भमा दक्षिण एशियामा पनि उसले विभिन्न बहानामा आफ्ना गतिविधि सञ्चालन गर्दै आइरहेको छ ।
हालै मात्रै मध्यपूर्वी देश इरानमाथि अघोषित रुपमा गरेको हमलाले एकप्रकारले अघोषित रुपमा तेश्रो विश्वयुद्धको शुरुवात भएको भन्न सकिन्छ ।
अमेरिकी साम्राज्यवादले विश्वका विभिन्न देशहरुमा आफ्नो “राष्ट्रिय सुरक्षा”, “लोकतन्त्रको संरक्षण” वा “आतंकवादविरुद्धको लडाइँ” जस्ता नाममा विभिन्न मुलुकहरूमा सशस्त्र हस्तक्षेप गर्दै आएको छ । कतिपय अवस्थामा त्यसको असर सकारात्मक भए पनि, धेरै अवस्थामा देशहरू अस्थिर र गृहयुद्धमा फसेका छन् ।
यसै बीच उसले लगातार रुपमा नेपाल माथि दबाब बनाउने उदेश्यले नेपालका विभिन्न राजनीतिक दलहरुका शिर्ष नेताहरुलाई भेटघाट गर्ने गर्दै आइरहेको छ । आज मात्रै उपराष्ट्रपति रामसहाय प्रसाद यादवसँग नेपालका लागि संयुक्त राज्य अमेरिकाका राजदूत डिन आर थम्प्सनले आज लैनचौरस्थित उपराष्ट्रपतिको कार्यालयमा शिष्टाचार भेटवार्ता गरेका छन् ।
भेटमा शुभकामना आदानप्रदानसँगै भएको वार्तामा नेपाल–अमेरिका सम्बन्धका विविध आयाम, द्विपक्षीय सहयोग, कूटनीतिक साझेदारी र आगामी सम्भावनाबारे छलफल भएको उपराष्ट्रपतिको सचिवालयले जनाएको छ ।
भेटवार्तामा मिलेनियम च्यालेञ्ज कर्पोरेशन (एमसिसी) अन्तर्गत सञ्चालित पूर्वाधार परियोजना र युएसएआइडीमार्फत भइरहेका कार्यक्रम पुनःसञ्चालन हुनेमा आशावादी रहेको उल्लेख गरिएको छ ।
सो अवसरमा राजदूत थम्प्सनले एमसिसी, युएसएआइडी लगायत अन्य विकास परियोजना सकारात्मक रुपमा निरन्तरताको मार्गमा अघि बढेको बताए ।
