प्रकाश थापा मगर/काठमाडौँ
प्रगतिशील लेखक सङ्घले “पूर्वीय दर्शनमा भौतिकवाद” शीर्षकमा बत्तिसौँ परिसंवाद कार्यक्रम सम्पन्न गरेको छ । केन्द्रीय अध्यक्ष प्रा.डा. जीवेन्द्र देव गिरीको प्रमुख आतिथ्यता तथा महासचिव समीर सिंहको विषयवस्तु प्रस्तुतिका साथ भर्चुअल विधिबाट २०७७ जेष्ठ २४ गते सो कार्यक्रम सम्पन्न भएको हो ।
कार्यक्रममा विषयवस्तु प्रस्तुत गर्दै महासचिव समीर सिंहले जीवन, जगत्का प्रत्येक विषयवस्तुलाई ठिक ठिक ढङ्गले बुझ्न दर्शनको अध्ययन आवश्यक भएको बताउनुभयो । ‘कुनै पनि विषयलाई बुझ्न विशुद्ध सम्बन्धित विषयलाई अध्ययन गरेर मात्र पुग्दैन’ उहाँले अगाडि भन्नुभयो– ‘त्यससित सम्बन्धित सबै विषयको अध्ययन नगरिकन समग्र विषयको सही जानकारी प्राप्त गर्न सकिन्न ।’
दर्शन बौद्धिक नौनी भएको बताउँदै दर्शनको माध्यमबाट नै विश्वलाई सही रूपले देख्न, बुझ्न सकिने उहाँको तर्क थियो । पूर्वीय जगत् अर्थात हिमतवत्खण्डमा पर्याप्त रूपमा भौतिकवाद रहेको बताउँदै उहाँले ऋग्वेददेखिका सबै धर्मशास्त्रमा समेत पर्याप्त मात्रामा भौतिकवाद रहेको उहाँको तर्क थियो ।
‘ऋग्वेद, उपनिषद्लगायत सबै शास्त्रमा भौतिकवाद रहेको बताउँदै उहाँले यस क्षेत्रमा लोकायत, साङ्ख्य, बौद्ध, वैशेषिक र न्याय दर्शनलाई मूल रूपमा भौतिकवादी दर्शन मान्न सकिने उहाँको तर्क थियो । पूर्वीय विश्वमा पनि प्राचीनकालमा प्रकृतिपूजा रहेको बताउँदै उहाँले यस क्षेत्रमा जातिव्यवस्था मनुस्मृतिपछि मात्र आएको उहाँले बताउनुभयो ।
महासचिव समीर सिंहको प्रस्तुतिउपर कार्यक्रममा पारस ढकाल, नारायण मरासिनी, डा. रामदेव पण्डित, जगत्प्रसाद रेग्मी, जनक रसिक, डा. प्रमोद ढकाल, प्रा.डा. पशुपतिप्रसाद तिमिल्सेना र शम्भु कट्टेलले पूरक मन्तव्य राख्नुभएको थियो ।
प्रलेसका केन्द्रीय उपाध्यक्ष तथा परिसंवाद उपसमितिका संयोजक गोपीरमण उपाध्यायको अध्यक्षतामा अघि बढेको उक्त कार्यक्रममा प्रमुख अतिथि प्रा.डा. जीवेन्द्र देव गिरीले मन्तव्य राख्दै दर्शन बिना मानव जीवन अधुरो रहने बताउनुभयो । उपमहासचिव आरसी न्यौपानेले समेत सङ्क्षिप्त मन्तव्य राख्नुभएको उक्त कार्यक्रमको सञ्चालन र स्वागत मन्तव्य केन्द्रीय सचिव प्रकाश थापा मगरले गर्नुभएको थियो ।
