तेहरान । इरानले प्रत्याक्रमस्वरूप इसराइलको सबैभन्दा ठुलो तेल प्रशोधन क्षेत्रमा मिसाइल प्रहार गरेको छ।
गत राति इरानले उत्तरी इसराइलको हाइफा बेमा रहेको तेल प्रशोधन क्षेत्रमा मिसाइल प्रहार गरेको हो ।
हमलापछि तेल प्रशोधन केन्द्र रहेको उक्त क्षेत्रमा आगो लागेको अमेरिकी मिडियाले जनाएका छन् ।
इरानी हमलाबाट त्यस क्षेत्र आगोको लप्काले ढाकिएका भिडियो र फोटा सामाजिक सञ्जालमा सार्वजनिक भएको छ । आगलागी भएपछि मानिसहरू त्यहाँ अड्किएका थिए । बिहान ढिलासम्म पनि उनीहरूको उद्धार र आगो नियन्त्रणमा इसराइली अधिकारीहरू खटिएका थिए ।
इरान र इसराइलले चार दिनदेखि एकअर्कामाथि आक्रमण गरिरहेका छन् । गत राति इसराइलले इरानका ८० ठाउँमा लक्ष्य गरेर आक्रमण गरेको न्यूयोर्क टाइम्सले जनाएको छ । आक्रमणमा परी २० जना उच्च सैन्य अधिकारी, आणविक वैज्ञानिक र नागरिक गरी २२० जनाभन्दा बढीको मृत्यु भएको र एक हजार २०० जनाभन्दा बढी घाइते भएको बताइएको छ ।
इसराइलको आपतकालीन सेवा मगेन डेभिड एडम (एमडिए) आपतकालीन सेवाले गएराति इरानले इसराइलका चार स्थानमा लक्ष्य गरेर आक्रमण गरेको जनाएको छ ।
तेलअभिभलगायतका क्षेत्रमा धेरै भवनमा क्षति पुगेको र अहिलेसम्म कम्तिमा १४ जना मारिएको बताइएको छ ।
तेलअभिभबाट दक्षिणमा रहेको तटीय सहर बातयाममा शनिबार राति ठुला ठुला भवन ध्वस्त भएका छन् । त्यहाँ रहेका ६० भन्दा बढी भवन कुनै न कुनै रूपमा क्षतिग्रस्त भएको बताइएको छ ।
जवाफमा इसराइलले इस्लामिक रिभोलुसनरी गार्ड कोरको सैन्य संरचना कुर्द्स फोर्सको कमान्ड सेन्टरमै लक्ष्य गरेर हमला गरेको जनाएको छ । तेहरानमा रहेको कमान्ड सेन्टरमा केही क्षति भएको बताइएको छ । (एजेन्सी)
