खलङ्गा । शिक्षा र चेतनाको माध्यमबाट विद्यार्थीमा राष्ट्रियता, जागरण र भविष्यप्रतिको सोच विकसित गराउने उद्देश्यले अखिल (छैठौँ) जिल्ला समिति प्युठानले आयोजना गरेको ‘देश कि विदेश’ शीर्षकको विद्यार्थी जागरण अभियान प्युठानको अडेबासस्थित बाल माध्यमिक विद्यालयमा सम्पन्न भएको छ ।
२०८२ असार १ गते सम्पन्न सो कार्यक्रमको अध्यक्षता तथा प्रमुख वक्ता अखिल (छैठौं) प्युठानका अध्यक्ष बसन्तराज गोराथोकी हुनुहुन्थ्यो ।
कार्यक्रममा “देशमै भविष्य खोजौँ, विदेश होइन” विषयमा केन्द्रित हुँदै गोराथोकीले मन्तव्य राख्नुभएको थियो ।
‘देश कि विदेश’ अभियानको सारतत्त्व स्पष्ट पार्दै उहाँले भन्नुभयो– ‘हाम्रो देशले युवाशक्ति गुमाइरहेको छ । सिप, श्रम र सशक्त सपना बोकेका युवाहरू विदेशतिर दौडिरहेका छन् । हामीले अब सोच बदल्नुपर्छ । देशमै अवसर सिर्जना गर्ने चेतना हामी विद्यार्थीबाटै सुरु हुन्छ ।’
उहाँले शिक्षालाई केवल जागिर खोज्ने माध्यम होइन, समाज परिवर्तन गर्ने हतियारको रूपमा लिनुपर्नेमा आवश्यकतामा जोड दिनुभयो ।
उहाँले थप्नुभयो– ‘अखिल (छैठौं) विद्यार्थी सङ्गठन मात्रै होइन, वैचारिक आन्दोलन हो । हामी शिक्षा, रोजगार र न्यायका लागि लड्छौँ । विदेश नगई, आफ्नै माटोमा आत्मनिर्भर जीवन निर्माण गर्न सकिन्छ भन्ने विश्वास हामी बोक्दछौँ ।’
५१ सदस्यीय एकाइ समिति
कार्यक्रमकै अवसरमा अखिल (छैठौं) ले बाल मावि अडेवासमा ५१ सदस्यीय एकाइ समिति गठन गरेको छ ।
समितिको अध्यक्षमा सुशाङ्क खरेल, उपाध्यक्षमा अरुणा रानामगर, सचिवमा सन्ध्या खरेल, सहसचिवमा प्रदीप पुन र कोषाध्यक्षमा सन्देश रानामगर रहनुभएको छ ।
कार्यक्रमको सञ्चालन अखिल (छैठौँ) प्युठानकी सदस्य अमृता सुनारले गर्नुभएको थियो ।
