काठमाडौँ । भाकपा (माले) मासलाइनले इरानमाथि इजरायली हमलाबारे भारत सरकारको रवैयाको विरोध गरेको छ ।

महासचिव प्रदीपसिंह ठाकुरको हस्ताक्षरमा जुन १४, २०२५ का दिन प्रेसवक्तव्य जारी गर्दै मासलाइनले यस्तो विरोध व्यक्त गरेको हो ।

वक्तव्यमा इरानमाथिको हमलाबारे भारत सरकारले खालि “चिन्ता” व्यक्त गरेकोमा आपत्ति प्रकट गरिएको छ ।

इजरायलद्वारा गरिएको सैन्य हमलाको उद्देश्य इरानको परमाणु क्षमतालाई तहसनहस गर्नु तथा पूरै मध्यपूर्वमा परमाणु एकाधिकार कायम राख्नु रहेको बताउँदै यस्तो गम्भीर विषयमा खालि “चिन्ता” व्यक्त गर्नु गलत भएको मासलाइनको तर्क छ ।

वक्तव्यमा इजरायललाई अमेरिकी साम्राज्यवादको ॅघनिष्ठ सहयोग’ बताउँदै यस्तो विनाशकारी गठबन्धनको विरोध गर्नुपर्ने आवश्यकतामा जोड दिइएको छ ।

कलकत्ताबाट हिन्दीमा जारी गरिएको प्रेसवक्तव्यको नेपाली भावानुवाद यस्तो छ :

“भारतको कम्युनिस्ट पार्टी (मार्क्सवादी–लेनिनवादी) मासलाइनको पोलिटब्युरो दुष्ट राष्ट्र इजरायलद्वारा इरानमाथि गरिएको सैन्य आक्रमणको स्पष्ट शब्दमा निन्दा गर्दछ । यस आक्रमणमा इरानका वरिष्ठ सैन्य अधिकारी, परमाणु वैज्ञानिक र सयौँ आम जनता मारिएका छन् । यो अभूतपूर्व सैन्य आक्रमण यस्तो समयमा गरिएको छ, जब अमेरिका र इरानमाझ परमाणु विषयमा सम्झौताका लागि वार्ता भइरहेको थियो ।
इजरायलको यो सैन्य आक्रमणको उद्देश्य इरानको परमाणु क्षमतालाई तहसनहस गर्नु तथा पूरै मध्यपूर्वमा आफ्नो परमाणु एकाधिकार कायम राख्नु हो । यस आक्रमणमा अमेरिकी साम्राज्यवाद इजरायलको घनिष्ठ सहयोगी हो ।

इरानमाथि इजरायलको यो सैन्य हमलाको सन्दर्भमा नरेन्द्र मोदी सरकारको भूमिका र प्रतिक्रिया खालि “चिन्ता” व्यक्त गर्नेसम्म सीमित छ । मोदी सरकार आक्रमणकारी र आक्रमणबाट पीडितमाझ अन्तर गर्न तथा आक्रमणकारीको विरोध गर्नमा असफल रहेको छ ।

जब संयुक्त राष्ट्र सङ्घको साधारणसभामा प्यालेस्टाइनमा निःशर्त र स्थायी युद्धविरामको प्रस्तावमाथि मतदान भयो, मोदी सरकार मतदानमा तटस्थ रह्यो, जबकि संसारका १४९ देशले प्रस्तावको समर्थनमा मतदान गरे ।

आफ्नो सम्प्रभुता, सुरक्षा र भौगोलिक अखण्डताको रक्षाका लागि सङ्घर्षरत इरान र त्यहाँका जनताप्रति भाकपा (माले) मासलाइन भित्री हृदयदेखि समर्थन गर्दछ ।

भाकपा (माले) मासलाइन भारत सरकारसित जोडदार शब्दमा माग गर्दछ, इजरायलसितका सबै कूटनीतिक, सैन्य, रजानीतिक र आर्थिक सम्बन्धलाई तत्कालै समाप्त गरियोस् ।

भाकपा (माले) मासलाइन भारतका शान्तिप्रेमी जनतासित आह्वान गर्दछ, इरान र प्यालेस्टाइनी जनतालाई समर्थन गरुन् र आफ्नो ऐक्यबद्धता कायम गरुन् ।”