रियाद । सन् २०२३ मा मेलमिलाप गर्नुअघि लामो समयदेखि तेहरानको प्रतिद्वन्द्वी रहेको रियादले शुक्रबार इरानमा सैन्य र आणविक स्थल विरुद्ध इजरायलले गरेको आक्रमणको कडा निन्दा गरेको छ ।
प्रमुख सैन्य कमान्डर र आणविक वैज्ञानिकको मृत्यु भएको आक्रमणले यस क्षेत्रमा पूर्ण युद्धको डर उत्पन्न गरेको छ र ओमानमा आइतबारका लागि तय गरिएको अमेरिका–इरान आणविक वार्तालाई जोखिममा पारेको छ ।
‘साउदी अरबले भ्रातृपूर्ण इस्लामिक गणतन्त्र इरान विरुद्ध इजरायली आक्रमणको कडा निन्दा र भर्त्सना व्यक्त गर्दछ । यो आक्रमणले यसको सार्वभौमिकता र सुरक्षालाई कमजोर पार्छ र अन्तर्राष्ट्रिय कानुन र नियमको स्पष्ट उल्लङ्घन गर्दछ’ विदेश मन्त्रालयले एक विज्ञप्तिमा भन्यो ।
यी आक्रमणलाई जघन्य आक्रमण का रूपमा वर्णन गर्दै मन्त्रालले भन्यो– ‘अन्तर्राष्ट्रिय समुदाय र संयुक्त राष्ट्रसङ्घीय सुरक्षा परिषद्ले यस आक्रामकतालाई तुरुन्त रोक्ने ठुलो जिम्मेवारी बोकेको छ ।’
इजरायली प्रधानमन्त्री बेन्जामिन नेतन्याहुले इरान विरुद्धको अपरेसन ‘जति दिन लाग्छ त्यति दिन जारी रहने’ बताउनुभएको छ ।
तेलको मूल्य १२ प्रतिशतभन्दा बढी बढेका कारण व्यापक द्वन्द्वको डरका साथ तेल समृद्ध यस खाडी मुलुकमा आक्रमणले स्तब्ध बनाएको छ ।
सन् २०२३ मा चीनले साउदी अरेबिया र इरानबिच ऐतिहासिक मेलमिलाप सम्झौताको मध्यस्थता गरेको थियो । साउदी अरब र इरानले लामो समयदेखि मध्यपूर्वका द्वन्द्वमा विपरीत पक्षलाई समर्थन गरेका थिए ।
प्रमुख शिया धर्मगुरु निम्र अल निम्रलाई मृत्युदण्ड दिएपछि इरानी प्रदर्शनकारीले साउदी कूटनीतिक मिसनमा आक्रमण गरेपछि रियादले सन् २०१६ मा सम्बन्ध तोडेको थियो । (राससरएएफपी)
