काठमाडौँ । नेकपा (मसाल) ले भारतीय कम्युनिस्ट पार्टी (माओवादी) का महासचिव वसबराजसहितका २८ जनाको हत्या भएकोमा श्रद्धाञ्जली व्यक्त गरेको छ ।
गत मे २१, २०२५ का दिन भारतको छत्तिसगढमा उनीहरूको हत्या भएपछि मसालले श्रद्धाञ्जली व्यक्त गरेको हो ।
मसालका महामन्त्री मोहनविक्रम सिंहको हस्ताक्षरमा २०८२ जेठ १८ गते आइतबार शोकवक्तव्य जारी गर्दै मसालले वसबराजको हत्याले भारतको क्रान्तिकारी आन्दोलन नरोकिने विश्वास व्यक्त गरेको छ ।
यस्तो छ, शोकवक्तव्यको पूर्ण पाठ :
“भारतमा कमरेड बसवराज र उनका साथीहरूको हत्याप्रति नेकपा (मसाल) ले समवेदना व्यक्त गर्दछ ।
हामीलाई विश्वास छ कि फासीवादी सरकारको यस्तो बर्बर कार्यले भारतको क्रान्तिकारी आन्दोलनलाई दबाउन सक्ने छैन र क्रान्तिकारी आन्दोलनको परिणामस्वरूप त्यहाँ समाजवादी व्यवस्था कायम हुनेछ भन्ने कुरामा हामी पूरा विस्वस्त छौँ ।
अन्तमा हामी कमरेड बसवराज र उनका साथीहरूलाई हाम्रो क्रान्तिकारी अभिवादन व्यक्त गर्दछौँ ।”
भारतीय सञ्चारमाध्यम र माओवादी पार्टीको प्रेसविज्ञप्तिका अनुसार महासचिव वसबराजको सुरक्षाका लागि ६० जनाको टोली सँगै रहने गरेको थियो तर त्यसमध्ये कैयौँले प्रहरीसामु आत्मसमर्पण गर्ने र तिनैले प्रहरीलाई साथ दिएपछि अन्तमा ३५ जनाको टिम महासचिवको साथमा थियो ।
मे १७ देखि चलेको प्रहरीको अपरेसन मे २१ सम्म आइपुग्दा सात जनाले प्रहरी घेरा तोडेर भागेका थिए भने बाँकी २७ जनामध्ये सबैको हत्या गरेपछि प्रहरीले वसबराजलाई ज्युँदै पक्रेर हत्या गरेको थियो । वसबराज र उनका साथीहरूको शव परिवारलाई सुम्पिएको थिएन ।
सो घटनाको भारतका थुप्रै वामपन्थी पार्टीहरूले विरोध गरेका थिए ।
