काठमाडौँ । बाह्र वर्षीया प्रतिष्ठा बडूले अङ्ग्रेजी भाषामा लेख्नुभएको ॅडेड अर अलाइभ’ नामक उपन्यास सार्वजनिक भएको छ ।
भाषा आयोगका पूर्व अध्यक्ष प्राडा लवदेव अवस्थीले एक कार्यक्रमबिच मङ्गलबार उक्त कृतिको विमोचन गर्नुभएको हो ।
पाठशाला फाउन्डेसन नेपालमा कक्षा ८ मा अध्ययनरत बडूको उक्त उपन्यास आवरण प्रकाशनले प्रकाशित गरेको छ । बीस खण्डमा विभक्त उक्त उपन्यासमा अक्रिनको कलाकारिता रहेको छ ।
सो उपन्यास लेखिका बडूले कोभिड–१९ को समयमा भोगेको अनुभूतिमा आधारित सचित्र अध्याय पुस्तक हो ।
सो अवसरमा प्राडा अवस्थीले कोभिड–१९ को बेला बालमस्तिष्कले भोगेको कटु अनुभवलाई प्रतिष्ठाले कलात्मक तरिकाले प्रस्तुत गर्नुभएको र उहाँमा प्रतिभाको प्रवाह प्रचुर रहेको बताउनुभयो ।
बाल साहित्य समाजका अध्यक्ष विजयराज आचार्यले देशका कुनाकुनामा रहेका बालप्रतिभाको खोजी गरी अगाडि ल्याउनुपर्नेमा जोड दिनुभयो ।
बालवाङ्मय तथा अनुसन्धान केन्द्रका अध्यक्ष अनन्त वाग्लेले उपन्यासमा साहसिक यात्रा, मानवीय समवेदना र स्वैरकल्पनाको सुन्दर मिश्रण रहेको बताउनुभयो ।
आवरण प्रकाशनका प्रबन्ध निर्देशक रमेश पौडेलले प्रतिष्ठामा अद्वितीय लेखन क्षमता रहेको विचार राख्दै उहाँलाई प्रकाशकका तर्फबाट प्रशंसापत्र प्रदान गर्नुभयो ।
क्याप्टेन वेद उप्रेतीले प्रतिष्ठता सुन्दर सुदूरपश्चिमबाट फक्रेकी बालप्रतिभा भएको बताउनुभयो ।
कृतिकारका पिता कैलाश बडूले छोरी सानैदेखि भावुक स्वभावकी र आँटेको कुरा गरेरै छाड्ने आँटिली भएको बताउनुभयो ।
पाठशाला नेपाल फाउन्डेसनका संस्थापक ईश्वरमणि अधिकारीले आफ्नो विद्यालयमा प्रतिष्ठाजस्ता बालप्रतिभा हुनुले विद्यालयको गरिमा बढाएको विचार राख्नुभयो ।
साहित्यकार जया बुढाथोकीले उपन्यास निकै पठनीय भएको बताउनुभयो ।
विद्यालयका प्रधानाध्यापक विश्वनाथ कँडेलले प्रतिष्ठा अध्ययनका साथै अतिरिक्त क्रियाकलापमा पनि अब्बल रहेको बताउनुभयो ।
उपन्यासकार प्रतिष्ठा बडूले आफ्नो लेखकीय अनुभूति सुनाउँदै पहिलो कृति बुबा कैलाशको जन्मदिनमै उपहार दिन पाएकामा गौरवको अनुभूति मिलेको बताउनुभयो ।
साहित्यकार एवम् कृतिकारकी हजुरआमा हेमन्ती जोशीले नातिनीले आफ्नै पदचिह्न पच्छ्याउँदै साहित्यिक यात्रा सुरु गरेकामा खुशी व्यक्त गर्नुभयो ।
