काठमाडौँ । नेपाल प्रज्ञा–प्रतिष्ठानको सामाजिकशास्त्र विभागले आगामी जेठ १६–१७ मा आयोजना गरेको वार्षिक सङ्गोष्ठीमा १३ ओटा विद्वान्का लेखमाथि चर्चा हुने भएको छ ।
विभागकी प्रमुख डा. कौशिला रिसालद्वारा २०८२ जेठ ७ गते जारी गरिएको विज्ञप्तिका अनुसार विभिन्न विषयमा उपलब्ध २७ मध्ये १३ ओटा लेखमाथि चर्चा हुन थालेको हो ।
प्रज्ञा–प्रतिष्ठानकै देवकोटा कक्षमा आयोजना हुन थालेको सो सङ्गोष्ठीमा ‘नेपाली समाजका विविधताहरू’ मुख्य विषय रहनेगरी विभिन्न ११ ओटा विषयमा लेख आह्वान गरिएको थियो । जेठ १ गते बसेको प्राज्ञिक मूल्याङ्कन समितिको बैठकमा सो सङ्ख्यामा लेख छनोट गरिएको विज्ञप्तिमा उल्लेख छ ।
छनौट भएका लेखहरूमा प्रा.डा. श्रीधर गौतमको ‘वैज्ञानिक समाजवाद र संस्कृति’, भैरवराज रेग्मीको ‘नेपाली किसानका समस्याको समाजशास्त्रीय अध्ययन’, प्रकाश थापामगरको ‘उत्पीडनका सामाजिक प्रभावहरू’, प्रा.डा. शम्भुप्रसाद खतिवडाको ‘सामाजिकशास्त्र अध्ययनका नयाँ आयामहरू’, डा. उत्तम खनालको ‘समाजवादउन्मुख अर्थतन्त्रको भ्रम र वास्तविकता’, डा. टिकाराम पोखरेलको ‘सीमान्तकृत समुदायका सवाल र मानवअधिकार’ र ईश्वरचन्द्र ज्ञवालीको ‘समाजवाद र संस्कृतिको विश्लेषण’ रहेका छन् ।
त्यसैगरी, सङ्गोष्ठीमा प्रा.डा. दीपबहादुर अधिकारीको ‘स्वास्थ्यविज्ञानको समाजशास्त्रीय अध्ययन’, डा. हिमलाल श्रेष्ठको ‘पर्यावरणको वैज्ञानिक विश्लेषण : विधि र चुनौतीहरू’, डा. लक्ष्मी थापामगरको ‘असमानताबाट वैचारिक रूपान्तरणतर्फ सामाजिक विभेदले पारेको प्रभाव’, डा. पासाङ शेर्पाको ‘हिमाली क्षेत्रमा प्रचलित आम्ची उपचार पद्धति’, धनबहादुर रेग्मीको ‘सार्वजनिक विद्यालयहरूमा हुने सामाजिक भेदभावको प्रभाव : जनजाति र दलित विद्यार्थी विरुद्धको प्रतीकात्मक हिंसा’ र माधव घिमिरेको ‘परमाणु कारणवादको सामाजिक उपयोगिता’ रहेका छन् ।
पहिलो दिन उद्घाटन समाराह प्रमुख वक्ता र पाँचओटा कार्यपत्र प्रस्तुत तथा समूहगत छलफलसहित तीन सेसन हुनेछ ।
दोस्रो दिन कार्यपत्र प्रस्तुत, समूहगत छलफल तथा समापनसहित चार सेसन हुनेछ ।
