सेलाया (मेक्सिको) । बन्दुकधारीले मेक्सिकोको सबैभन्दा घातक राज्यमा केही नाबालिगसहित सात जनालाई गोली हानेका छन् । त्यहाँ लागुपदार्थ कार्टेलबिचको हिंसाले क्याथोलिक चर्चको निन्दा निम्त्याएको छ ।

मध्यराज्य गुआनाजुआटोमा भएको यो आक्रमण स्थानीय समयानुसार सोमबार बिहान २ बजे सान फेलिप सहरको एक प्लाजामा भएको थियो । त्यहाँ स्थानीय प्रहरीले गोली हानाहानको रिपोर्टपछि सबै पुरुषसहित सात शव र क्षतिग्रस्त भ्यान फेला पारेको स्थानीय सरकारले एक विज्ञप्तिमा बताएको छ ।

अधिकारीले त्यस क्षेत्रमा सक्रिय सान्ता रोसा डी लिमा गिरोहसँग सम्बन्धित सन्देश भएका दुई ब्यानर पनि फेला पारेको विज्ञप्तिमा उल्लेख छ ।

गुआनाजुआटो एक फस्टाउँदो औद्योगिक केन्द्र र धेरै लोकप्रिय पर्यटन गन्तव्यको घर हो तर आधिकारिक हत्या तथ्याङ्कअनुसार यो मेक्सिकोको सबैभन्दा घातक राज्य पनि हो ।

हिंसात्मक अपराध सान्ता रोसा डी लिमा गिरोह र ल्याटिन अमेरिकी राष्ट्रको सबैभन्दा शक्तिशालीमध्ये एक जलिस्को न्यू जेनेरेसन कार्टेलबिचको द्वन्द्वसँग जोडिएको छ ।

क्याथोलिक चर्चका मेक्सिकाली नेताहरूले सोमबार गोली हानाहानको निन्दा गर्दै यसलाई बहुसङ्ख्यक क्याथोलिक रहेको देशको सामाजिक संरचना कमजोर हुने, दण्डहीनता र विशाल क्षेत्रमा शान्तिको अभावको चिन्ताजनक सङ्केत भनेका छन् ।

‘यति धेरै समुदायलाई घाइते बनाइरहेको हिंसाको लहरमा हामी उदासिन रहन सक्दैनौँ’ मेक्सिकोका बिसपको सङ्गठन मेक्सिकोको एपिस्कोपल कन्फरेन्सले एक विज्ञप्तिमा भन्यो– ॅगोली प्रहार पीडादायी आवृत्तिका साथ दोहोरिरहेका धेरैमध्ये एक थियो ।’

डिसेम्बरमा मेक्सिकोको चर्चले युद्धरत कार्टेललाई युद्धविराम घोषणा गर्न आह्वान गरेको थियो ।

आधिकारिक आँकडाअनुसार गुआनाजुआटोले गत वर्ष मेक्सिकोको कुनै पनि राज्यमा सबैभन्दा धेरै तीन हजार एक सय ५१ हत्या रेकर्ड गरेको थियो, जुन राष्ट्रिय स्तरमा हत्याको १० दशमलव पाँच प्रतिशत हो ।

सन् २००६ मा सेनाले लागुपदार्थ विरुद्ध अभियान सुरु गरेयता मेक्सिकोमा करिब चार लाख ८० हजार हिंसात्मक मृत्युको सङ्ख्या पुगेको छ । (रासस/एएफपी)