दाङ । जेठ १ को विद्यार्थी दिवसको अवसर पारेर अखिल (छैठौँ) दाङले “निराशा, पलायन र लागुऔषध दुर्व्यसन विरुद्धको सचेतना अभियान, जहाँ शैक्षिक संस्था, त्यहाँ अखिल (छैठौँ)” भन्ने नारासहित उदघाटन गरेको छ ।
अभियानको उद्घाटन कार्यक्रम घोराही–१४ स्थित बालविकास माध्यमिक विद्यालययमा सम्पन्न भएको हो ।
युनियनका केन्द्रीय सदस्य तथा दाङ जिल्ला अध्यक्ष सेवक भट्टराईले उक्त अभियानको उद्घाटन गर्नुभएको हो ।
अखिल (छैठौँ) राष्ट्रिय परिषद् सदस्य उत्सव पुनको सञ्चालनबाट अगाडि बढेको उक्त कार्यक्रममा दाङ–प्युठान सम्पर्क मञ्चका अध्यक्ष बसन्तराज गोराथोकीले पनि मन्तव्य राख्नुभएको थियो ।
उद्घाटन कार्यक्रममा बोल्दै अध्यक्ष भट्टराईले विद्यार्थीमा बढ्दो निराशा, वैदेशिक पलायनको मोह र लागुऔषधको लतले समाजमा गम्भीर असर पारिरहेको बताउनुभयो ।
उहाँले यस्ता अभियान विद्यालयस्तरमै सुरु गर्नुको उद्देश्य शिक्षालयलाई सचेतना र सशक्तीकरणको केन्द्र बनाउनु रहेको स्पष्ट पार्नुभयो ।
अभियानअन्तर्गत जिल्लाका विभिन्न शैक्षिक संस्थामा चरणबद्ध रूपमा अन्तर्क्रिया, प्रशिक्षण, सांस्कृतिक कार्यक्रम तथा जनचेतनामूलक गतिविधि सञ्चालन गरिने अध्यक्ष भट्टराईले जानकारी दिनुभयो ।
दाङ–प्युठान सम्पर्क मञ्चका अध्यक्ष गोराथोकीले भन्नुभयो– ‘हामी विद्यार्थीलाई आत्मनिर्भर, जिम्मेवार र सकारात्मक सोच भएका नागरिकको रूपमा तयार पार्न चाहन्छौँ । यो अभियान त्यसतर्फको पहिलो कदम हो ।’
अखिल (छैठौँ) दाङले यस अभियानलाई भाद्र महिनाको मसान्तसम्ममा जिल्लाका सम्पूर्ण शिक्षण संस्थामा पुऱ्याउने लक्ष्य लिएको आयोजकले जानकारी दिएको छ ।
