महेश रिजाल, दाङ ।
‘गुणस्तरीय शिक्षा, उत्कृष्ट नतिजा’ भन्ने मूला नारासहित ऐरावती आदर्श बहुमुखी क्याम्पसको सोह्रौँ क्याम्पससभा सम्पन्न भएको छ ।
राप्ती २ लालमटियास्थित सो क्यापसको सभा २०८२ वैशाख २० गते शनिबार सम्पन्न भएको हो ।
क्याम्पससभा र नवनिर्मित क्याम्पसको १८ कोठे तीनतले भवनको उद्घाटन प्रमुख अतिथि पूर्वमन्त्री एवम प्रतिनिधिसभा सदस्य मेटमणि चौधरीले गर्नुभएको थियो ।
उक्त भवन विश्वविद्यालय अनुदान आयोग, सानोठिमी भक्तपुरको भौतिक निर्माण शीर्षकमा प्राप्त दुई करोड ५० लाखको लागतमा भएको थियो ।
उद्घाटन मन्तव्यमा उहाँले यस क्याम्पस स्थापनाले स्थानीय विपन्न समुदायका विद्यार्थीलाई उच्च शिक्षा हासिल गर्न टेवा पुगेको भन्दै यसको समुच्च विकासका लागि आफूले सक्दो सहयोग र प्रयास गर्ने प्रतिबद्धता व्यक्त गर्नुभयो ।
सोही समारोहलाई सम्बोधन गर्नुहुँदै विशिष्ट अतिथि राप्ती बबई क्याम्पसका पूर्व क्याम्पसप्रमुख एवम् पब्लिक क्याम्पस प्राध्यापक सङ्घ लुम्बिनी प्रदेश अध्यक्ष सहप्राध्यापक युवराज रावतले ऐरावती आदर्श बहुमुखी क्याम्पसले आफ्नो स्थापनाकालको छोटो समयमै त्रिभुवन
विश्वविद्यालयबाट सम्बन्धन प्राप्त गरी गुणस्तर सुनिश्चितता प्रत्यायनका सुचकाङ्क पूरा गर्ने आधार तयार गर्नु ठुलो उपलब्धि भएको बताउनुभयो ।
क्याम्पस सभालाई अर्का विशिष्ट अतिथि चैतन्य पाठशाला मौरीघाटका प्रबन्ध निर्देशक डा. जिवराज आचार्य, पूर्व क्याम्पस सञ्चालक समितिका अध्यक्ष तथा वर्तमान सल्लाहकार चन्द्रबहादुर जिसी, नेपाली काङ्ग्रेसका प्रतिनिधि दुर्योधन पाण्डे, लेखा समितिका संयोजक कृष्ण गिरी, गढवा बहुमुखी क्याम्पसका प्रमुख विकास रजौरे, स्वतन्त्र विद्यार्थी युनियनका सभापति विनोदकुमार सोनीलगायतले शुभकामना मन्तव्य दिनुभएको थियो ।
क्याम्पस सञ्चालन समितिका अध्यक्ष केशवराज खनालको अध्यक्षतामा सम्पन्न क्याम्पससभामा तामपितम स्मृति अक्षयकोष, रविलाल बोधकुमारी न्यौपाने अक्षयकोष, जगतप्रसाद पौडेल अक्षयकोष, धनबहादुर कुमारी देवी भट्टराई अक्षयकोषबाट क्याम्पसका निवर्तमान क्याम्पस प्रमुख विष्णुप्रसाद भुसाललाई नगदसहित प्रमाणपत्रले सम्मान गरिएको थियो ।
त्यसैगरी, क्याम्पसमा उत्कृष्ट हुने र विपन्न, जेहेनदार छात्रछात्रा सन्ध्या अधिकारी, आरजु परियार, सङ्गीता रावत, सागर चौधरी, अस्मिता आचार्य, चन्द्रकला चौधरी, प्रमिला योगी, सुस्मिता नेपालीलाई पूर्व क्याम्पस सञ्चालक समितिका अध्यक्ष एवम् वर्तमान सल्लाहकार चन्द्रबहादुर जिसीले नगदसहित प्रमाणपत्रद्वारा सम्मान गर्नुभएको थियो ।
क्याम्पससभामा क्याम्पस प्रमुख विक्रान्त ज्ञवालीले क्याम्पसको शैक्षिक प्रगति प्रतिवेदन तथा कोषाध्यक्ष ताराप्रसाद भुसालले आर्थिक प्रतिवेदन प्रस्तुत गर्नुभएको थियो । उक्त दुवै प्रतिवेदन माथि व्यापक छलफलपछि करतल ध्वनिका साथ पारित भएको थियो ।
सहायक क्याम्पस प्रमुख चन्द्रप्रकाश ओलीको सञ्चालन, क्याम्पस सञ्चालक समितिका सदस्य रामप्रसाद चौधरीको स्वागत मन्तव्यबाट सुरु भएको क्याम्पससभामा क्याम्पसका छात्रछात्राले विविध मनोरञ्जनात्मक र सन्देशमूलक नृत्य प्रस्तुत गरेका थिए ।
