काठमाडौँ । गत चैत २० गतेदेखि काठमाडौँकेन्द्रित आन्दोलन गरिरहेका शिक्षकमाथि प्रहरी दमन भएको छ ।
आन्दोलन सुरु भएको छब्बिसौँ दिन २०८२ वैशाख १४ गते प्रहरीले दमन गरेको हो ।
नेपाल शिक्षक सङ्घमा आबद्ध अखिल नेपाल शिक्षक सङ्घका महासचिव चक्रपाणि पौडेलका अनुसार आन्दोलनमा घुसपैठको प्रयास भएपछि शिक्षकको एउटा समूहले निषेधाज्ञा तोड्ने प्रयास गरेको थियो ।
‘एक जना मोटो अग्लो मानिसले हाम्रो आन्दोलनलाई भड्काउन प्रयास गरेपछि शिक्षक साथीहरूलाई पक्राउ गरेका थिए’ पौडेलले युगदर्शनसित भन्नुभयो– ‘त्यो व्यक्ति भाग्ने क्रममा भएको तनावका कारण शिक्षक पनि उत्तेजित हुँदा परिस्थिति असहज बन्यो ।’
उहाँका अनुसार प्रहरी दमनबाट एक दजर्नभन्दा बढी आन्दोलनकारी शिक्षक घाइते भएका छन् ।
‘एम्बुलेन्स बोलाएर घाइते शिक्षकहरूलाई सिभिल अस्पतालमा भर्ना गरिएको छ’ उहाँले भन्नुभयो ।
महासङ्घले मञ्चबाट शिक्षकमाथि प्रहरी दमनको भर्त्सना गरेको छ ।
त्यस्तै, महासङ्घले नयाँ परिस्थितिबारे निर्णय गर्न बैठक बोलाएको जानकारी प्राप्त भएको छ ।
