काठमाडौँ । गत २५ दिनदेखि राजधानीकेन्द्रित आन्दोलन गरिरहेको नेपाल शिक्षक महासङ्घ र सरकारमाझ आजको वार्ता बिनानिष्कर्ष टुङ्गिएको छ ।
शिक्षा तथा प्रविधिमन्त्री रघुजी पन्तको उपस्थिति सम्पन्न वार्ताले कुनै निष्कर्ष दिन नसकेको हो ।
आजै सहमति हुन नसके पनि छलफल र संवादलाई निरन्तरता दिने निर्णय भएको महासङ्घका अध्यक्ष लक्ष्मीकिशोर सुवेदीले जानकारी दिनुभयो ।
बैठकपछि सञ्चारकर्मीसँग बोल्दै उहाँले भन्नुभयो– ॅछलफललाई निरन्तरता दिने कुरा भयो । द्विपक्षीय सहमतिमा फेरि फेरि बस्ने संवाद गर्ने निरन्तरता दिने निर्णय भएको छ । अर्को बैठक कहिले बस्ने टुङ्गो भएको छैन ।’
कम्तीमा संसद्मा विद्यालय शिक्षा विधेयक प्रवेश गर्नुपर्ने र ग्रेडवृद्धि, मर्यादाक्रमलगायतका विषय मन्त्रिपरिषद्बाट निर्णय भएपछि आन्दोलन के गर्ने भन्ने विषयमा सोच्ने सकिने महासङ्घको भनाइ छ ।
आजको वार्तामा आन्दोलनरत शिक्षक महासङ्घले आफ्ना मागबारे मन्त्री पन्तलाई जानकारी दिएका थिए । मन्त्रालयबाट भने शिक्षकका माग सम्बोधनबारे ठोस कुरा आइनसकेको बताइएको छ तर वार्तालाई निरन्तरता दिने सहमति भने भएको छ
शिक्षकहरू आन्दोलित भएको आज पचासिऔँ दिन भएको छ । शैक्षिक हड्ताल गरेर काठमाडौँकेन्द्रित सडक आन्दोलन गरेको पनि २५ दिन पुगेको छ ।
लामो समय सार्वजनिक शिक्षा प्रभावित भएपछि सरकारले माग सम्बोधनका लागि केही तदारुकता देखाए पनि शिक्षकको अडानका कारण सहमति हुन सकेको छैन ।
यसअघि, बिहीबार सर्वोच्च अदालतले विद्यार्थीको पठनपाठन सञ्चालन गर्ने गरी तीनभित्र शिक्षकका माग सम्बोधन गर्न आदेश दिइसकेको छ ।
