काठमाडौँ । सरकारले नै वार्ताटोली तोकेपछि शुक्रबार ३ बजे हुने भनिएको शिक्षक–सरकार वार्ता हुन सकेन ।
शिक्षा तथा प्रविधिमन्त्री रघुजी पन्तले वार्ता आह्वान गरेपछि २०८२ वैशाख १२ गते शुक्रबार सिंहदरबार दक्षिणी गेट पुगेको टोली फर्किएको हो ।
नेपाल शिक्षक महासङ्घमा आबद्ध संस्था अखिल नेपाल शिक्षक सङ्घका अध्यक्ष सानोभाइ कार्कीका अनुसार महासङ्घसित सल्लाह नै नगरी एकतर्फी रूपमा वार्ताटोली गठन गरिएपछि आज वार्ता हुन सकेन ।
अध्यक्ष कार्कीले युगदर्शनसित भन्नुभयो– ‘महासङ्घसित सल्लाह नै नगरी सरकारले एकतर्फी रूपमा वार्ताटोली गठन गरेको थियो । त्यो लिस्ट मिडियामा आइसकेको थियो । त्यसैले आज वार्ता हुन सकेन । हामी यसबारे छलफल गरिरहेका छौँ ।’
उहाँले यस विषयमा छलफल भइरहेको र सम्भवतः भोलि वार्ता हुन सक्ने सम्भावना व्यक्त गर्नुभयो ।
शिक्षक महासङ्घका अध्यक्ष लक्ष्मिकिशोर सुवेदीले पनि सो तथ्य पुष्टि गर्नुभयो ।
‘शिक्षा विज्ञान तथा प्रविधि मन्त्रालयबाट सार्वजनिक भएको २५ सदस्यीय नामावली नेपाल शिक्षक महासङ्घले तयार नगरेको ब्यहोरा जानकारी गराउँछौँ’ सुवेदीले सामाजिक सञ्जालमा लेख्नुभएको छ– ‘आज मिति २०८२ वैशाख १२ गते नवनियुक्त माननीय मन्त्रीज्यूसँग औपचारिक भेटका लागि हामी जाने क्रममा थियौँ तर विशेष कारणवश आज हामी मन्त्रालय प्रवेश नगरी फर्किएको कुरा जानकारी गराउँछौँ ।’
यता, महासङ्घको टिम सिंहदरबार दक्षिणी गेट पुग्दा गेटपास तयार भएको थिएन ।
आफूहरू वार्ताका लागि सिंहदरबारमा पुगेको तर गेटपास नपाएपछि बाहिरिएको शिक्षक सङ्घका अध्यक्ष कार्कीले जानकारी दिनुभयो ।
‘हामी सधैँझैँ शिक्षा मन्त्रालय जानका लागि आफ्नो परिचय खुल्ने कागजातसहित गएका थियौँ’ कार्कीले भन्नुभयो– ‘तर आज तपाईंहरू आन्दोलनबाट आउनुभएको हो । प्रवेशका लागि अनुमति छैन भनेर गेटबाटै फर्काइयो । हामी त्यहाँबाट फर्किएर आन्तरिक बैठकमा छौँ ।’
कार्कीले गेटपासभन्दा पनि गम्भीर विषय सरकारले एकतर्फी रूपमा वार्ताटोली गठन गर्नु रहेको बताउनुभयो ।
त्यस्तै, शिक्षक महासङ्घका अध्यक्ष सुवेदीले पनि आफूहरूलाई सिंहदरबार प्रवेश नदिइएको स्पष्ट पार्नुभयो ।
यता, शिक्षकका प्रतिनिधि हिँडेपछि पास बोकेर शिक्षा मन्त्रालयका सहसचिव र डिएसपी सिंहदरबारको गेटमा पुगेका थिए ।
