काठमाडौँ । अखिल (छैठौं) को ‘देश कि विदेश’ अभियान आगामी २०८२ जेठमा सञ्चालन हुने भएको छ ।
अध्यक्ष सुवाश जिसीको हस्ताक्षरमा २०८१ चैत ३१ गते प्रेसविज्ञप्तिमा जारी गर्दै युनियनले सो जानकारी दिएको हो ।
चैत २८ र २९ गते सम्पन्न केन्द्रीय समिति बैठकको निर्णय जानकारी गराउनका लागि जारी गरिएको सो प्रसविज्ञप्तिमा राजावादीद्वारा चैत १५ गते गरिएको तोडफोडको भर्त्सना गरिएको छ ।
स्ववियु निर्वाचनको सन्दर्भमा युनियनले विजयी तथा उम्मेदवार र सम्बद्ध सबै पक्षप्रति धन्यवाद ज्ञापन गरिएको छ ।
राष्ट्रिय जनमोर्चाको सङ्घीयता खारेजीका लागि काठमाडौँकेन्द्रित आन्दोलनमा सहभागी सबैप्रति पनि धन्यवाद ज्ञापन गरिएको सो विज्ञप्तिमा शिक्षक आन्दोलनप्रति समर्थन व्यक्त गरिएको छ ।
यस्तो छ, प्रेसविज्ञप्तिको पूर्ण पाठ :
“यही चैत २८ र २९ गते अखिल (छैठौं) केन्द्रीय समितिको तेस्रो पूर्ण बैठक काठमाडौँ कपनमा सम्पन्न भयो । बैठकले गरेका निर्णय सार्वजनिक गर्न यो वक्तव्य जारी गरिएको छ ।
१. देशको गणतन्त्र र राष्ट्रियतामाथि भइरहेका आक्रमणको बारेमा गम्भीरतापूर्वक छलफल भयो । नेपाली जनताको लामो सङ्घर्ष र बलिदानवाट प्राप्त उपलब्धिमाथि प्रतिगामी तत्त्वबाट हमला भइरहेको र यो स्थितिमा गणतन्त्रको रक्षाका लागि सम्पूर्ण युवा, विद्यार्थी एवम् जनता सचेत रहन र सङ्घर्षको लागि तयार रहनसमेत हाम्रो सङ्गठन हार्दिक अनुरोध गर्दछ । राजावादीले चैत १५ गते गरेको लुटपाट, आगजनी र हत्याको हाम्रो सङ्गठन भर्त्सना गर्दछ । दोषीलाई हदैसम्मको कारबाहीको माग गर्दछ । गणतन्त्र र राष्ट्रियताको रक्षा र सङ्घीयताको खारेजीका लागि आगामी २०८२ को जेठमा देशभक्त विद्यार्थीहको अभियान “देश कि विदेश ?” सञ्चालन गर्ने निर्णय भएको छ ।
२. गत चैतमा सम्पन्न स्वतन्त्र विद्यार्थी युनियनको निर्वाचनमा त्रिभुवन विश्वविद्यालय, मध्यपश्चिम विश्वविद्यालय र सुदूरपश्चिम विश्वविद्यालयअन्तर्गतका आङ्गिक तथा सम्बन्धनप्राप्त क्याम्पसमा अखिल (छैठौं) को तर्फबाट उम्मेदवार रहनुहुने तथा विजयी प्राप्त गर्नुहुने सम्पुर्ण साथीलाई सङ्गठन हार्दिक धन्यवाद एवम् बधाई व्यक्त गर्दछ । निर्वाचन सम्पन्न गर्न अहोरात्र खट्नुहुने सङ्गठनका साथी, क्याम्पस प्रशासन, निर्वाचन समिति र सम्पूर्ण विद्यार्थी सङ्गठनमा समेत हार्दिक आभार व्यक्त गर्दछौँ । कैयौँ क्याम्पसमा विद्यार्थी सङ्गठन र क्याम्पस प्रशासनका कारण हालसम्म पनि निर्वाचन भएको छैन । त्यसप्रति दुःख प्रकट गर्दछौँ र यथाशीघ्र निर्वाचनको माग गर्दछौँ । यसपटक देशका विभिन्न क्याम्पसमा सङ्गठनको उपस्थिति उत्साहजनक रहेको समीक्षा भएको छ ।
३. राष्ट्रिय जनमोर्चाद्वारा गत चैत २४–२८ मा आयोजित सङ्घीयता विरुद्ध राजधानीकेन्द्रित आन्दोलन भव्य रूपमा सम्पन्न भएको छ । यो आन्दोलनले सङ्घीयता खारेजीको वातावरणलाई अझ प्रभावकारी बनाएको छ र सङ्घीयता खारेजीको अभियानलाई समेत थप पुष्टि गरेको छ । अखिल (छैठौं) का नेता एवम् समर्थक विद्यार्थीको महत्त्वपूर्ण उपस्थिति तथा आन्दोलनमा नेतृत्वदायी भूमिकाप्रति सङ्गठन हार्दिक आभार प्रकट गर्दछ । सङ्घीयता विरुद्धको आन्दोलनलाई थप उचाइमा पुराउनुपर्ने आवश्यकतालाई हाम्रो युनियनले जोड दिएको छ ।
४. गत चैत २० गतेबाट विद्यालय शिक्षा ऐन जारी हुनुपर्ने माग राखेर शिक्षकहरू सडक आन्दोलनमा रहेका छन् । विडम्बनापूर्ण अवस्था के छ भने सरकार र सांसदले स्वतःस्फूर्त गर्नुपर्ने कामको लागि स्वयम् शिक्षक सडकमा आउँदा पनि सरकारले माग सम्बोधन गर्ने रुचि देखाएको छैन । हामीले शिक्षा ऐन जारी गर्नुपर्ने शिक्षकको मागलाई दृढतापूर्वक समर्थन गर्दछौँ र सङ्गठनको एक्यबद्धता व्यक्त गर्दछौँ । शिक्षकको आन्दोलनको कारण विद्यार्थीको भर्ना अभियान प्रभावित भएको छ । यसले सार्वजनिक विद्यालयलाई ठुलो क्षति हुनेछ । यसको प्रमुख दोषी स्वयम् सरकार रहेको हाम्रो ठम्याइ छ । हामीले सरकारलाई चाँडोभन्दा चाँडो शिक्षकसँग सहमति गरी विद्यालय पठाउन जोडदार माग गर्दछौँ ।
अन्तमा नववर्ष २०८२ को अवसरमा सम्पूर्ण देशभक्त जनता, विद्यार्थी वर्ग, शिक्षक, प्राध्यापक एवम् समस्त जनसमुदायमा हार्दिक शुभकामना व्यक्त गर्दछौँ ।”
