काठमाडौँ । नेपाल पुस्तक तथा स्टेसनरी व्यवसायी संघले विद्यालयबाट स्टेसनरी सामग्री बेचबिखन नगर्न चेतावनी दिएको छ ।
नयाँ शैक्षिक सत्र सुरु हुन लाग्दा कतिपय निजी विद्यालयले स्कुलबाटै कापी उपलब्ध गराउने भन्दै विद्यार्थीलाई सूचना जारी गरेको पाइएकोले त्यसो नगर्न व्यवसायीले खबरदारी गरेका हुन्।
नेपाल पुस्तक तथा स्टेसनरी व्यवसायी संघ बूढानीलकण्ठ नगर समितिका सदस्य विष्णु जेबी थापामगरले सर्वोच्च अदालतको आदेश तथा नगरपालिका, व्यवसायी र प्याब्सन–एनप्याव्सनको सहमतिविपरित केही विद्यालयले स्कुलबाटै विद्यार्थीलाई कापी वितरण गर्ने सूचना गरेको पाइएको बताए ।
सर्वोच्चको आदेश तथा व्यवसायीसँगको सहमतिविपरित कुनै विद्यालयले कापी विक्री गरेको पाइए ती विद्यालयविरुद्ध कडा कदम चाल्ने उनले चेतावनी दिए ।
काठमाडौँको बूढानीलकण्ठ नगरपालिका जनचोकका व्यवसायी थापाले आफूहरूले यो विषयमा बूढानीलकण्ठ नगरपालिकाको ध्यानाकर्षण गराइसकेको र व्यवसायीहरूले अन्य स्थानीय तहहरूमा समेत ज्ञापन पत्र दिएको उल्लेख गरे ।
व्यवसायी विष्णु जेबी थापामगर
युगदर्शनसँग कुरा गर्दै थापामगरले भने, ‘विद्यालयबाट स्टेसनरी सामान बिक्री गर्नु गैरकानुनी हो । सर्वोच्च अदालतले विद्यालयबाट स्टेसनरी बिक्री नगर्न आदेश दिइसकेको छ । हामी व्यवसायीसँग पनि स्थानीय तहले प्याव्सन, एनप्याव्सन लगायतका संस्थासहित मिटिङ राखेर विद्यालयबाट स्टेसनरी नबेच्ने सहमति गराइसकेको छ ।’
उनले थपे, ‘यदी यसका बाबजुद पनि विद्यालयबाट कापीलगायत स्टेसनरी सामान विक्री गरेको पाइए हामी कडा कदम चाल्नेछौँ । नगरपालिकाले त्यसमा हामीलाई साथ दिने बताएको छ ।’
स्मरणीय छ, गतवर्ष पनि बूढानीलकण्ठ क्षेत्रका कतिपय विद्यालयले स्टेसनरी सामान बिक्री गरेका थिए । बूढानीलकण्ठ नगरपालिकाले केही स्कुलमा छापा मारी त्यस्ता कापी बरामद गरेको थियो । तर, स्कुलले छापी सकेको कापी केही स्टक रहेको र यो वर्ष (२०८१ साल) मा मात्रै वितरण गर्ने, अर्को वर्षदेखि कापी नबेच्ने विद्यालयहरूको आग्रहमा सामान्य कारबाही गरेर छोडिदिएको थियो ।
तर, यसवर्ष पनि कापी बिक्री गरेको पाइए थप कारबाही गर्ने नगरपालिकाका मेयर मिठाराम अधिकारीले व्यवसायीसँग बताएका थिए ।
विद्यार्थीलाई स्कुलबाटै स्टेसनरी कापी बिक्री गर्दा अभिभावकले चर्को मूल्य तिर्नुपर्ने, छुट नपाउने जस्ता समस्या खेप्नुपर्छ भने आफ्नो व्यवसाय चौपट हुने स्टेसनरी व्यवसायीले गुनासो गर्दै आएका छन् ।
सर्वोच्च अदालतले यसबारे आदेश दिइसकेपनि नियामक निकायको लापरवाही र निजी विद्यालयको दादागिरीका कारण कतिपय विद्यालयले स्कुलबाटै वा स्कुलले तोकेको पसलबाट मात्रै कापी किन्न बाध्य पार्दा अभिभावक मर्कामा पर्ने गरेका छन् ।
