काठमाडौँ । शिक्षा ऐन जारी गर्न माग गर्दै आन्दोलनरत शिक्षकहरू माग पूरा नभएसम्म आफूहरू कार्यक्षेत्रमा नफर्किने बताएका छन् ।
२०८१ चैत ३० गते शनिबार काठमाडौँको माइतीघर मण्डलामा प्रदर्शनका क्रममा शिक्षकहरूले यस्तो बताएका हुन् ।
चैत २० गतेदेखि आन्दोलनरत शिक्षकहरू शनिबार एघारौँ दिन पनि सडकमै बसेर प्रदर्शन गरिरहेका छन् । नेपाल शिक्षक महासङ्घको नेतृत्वमा आन्दोलन भइरहेको छ ।
विद्यालय शिक्षा ऐन जारी गर्नुपर्ने मुख्य मागसहित सडक आन्दोलनमा उत्रिएको महासङ्घले आन्दोलन र सरकारसँगको वार्ता पनि सँगसँगै गरिरहेको छ ।
नेपाल शिक्षक महासङ्घ राष्ट्रिय कार्यसमिति सदस्य गङ्गा ढुङ्गानाले सरकार र शिक्षक महासङ्घबिच विगतमा भएका सम्झौताबमोजिम सरकारले ऐन जारी नगरेपछि आन्दोलन उत्रिएको बताइन् ।
उनले एक लाख शिक्षक सडकमा आएर आन्दोलन गर्दा पनि सरकार शिक्षाप्रति उदासिन बनेको आरोप लगाइन् । उनले संसद्को नियमित अधिवेशन, विशेष अधिवेशन वा अध्यादेशमार्फत ऐन जारी गर्नुबाहेक अरू विकल्प नरहेको बताइन् ।
शिक्षकको मागमा सरकारले बेवास्ता गरे शिक्षा क्षेत्र दशकौँसम्मका लागि ध्वस्त हुन सक्ने उनको भनाइ छ ।
राष्ट्रिय शिक्षक मञ्च नेपालका राष्ट्रिय अध्यक्ष कुमोदकुमार सिंहले शिक्षकहरू ऐन जारी गर्न मागसहित आन्दोलनमा उत्रिएको एघारौँ दिनसम्म पनि सरकार माग सम्बोधन गर्न गम्भीर नभएको आरोप लगाए ।
उनले सरकारले शिक्षकको माग तत्काल सम्बोधन गरेर शिक्षकलाई विद्यालय फर्काउनुपर्ने बताए । आन्दोलन अराजकतातर्फ मोडियो भने त्यसको सम्पूर्ण जिम्मेवारी सरकारले लिनुपर्ने उनको भनाइ छ ।
सरकार र महासङ्घबिच विगतमा भएको सहमति तत्काल कार्यान्वयन गर्नुपर्ने माध्यमिक तहकी एक सामाजिक शिक्षक बताउँछिन् । उनले विद्यार्थी भर्नाको समय भएकाले सरकारले तत्काल शिक्षा ऐन जारी गरेर शिक्षकलाई पठनपानको क्षेत्रमा पठाउनु पर्ने बताइन् ।
शिक्षा ऐन जारी नभएसम्म आफूहरू विद्यालय नफर्किने आन्दोलनरत शिक्षकले बताएका छन् । सामुदायिक विद्यालयलाई ध्वस्त पार्न सरकारले अहिलेसम्म शिक्षा ऐन जारी नगरेको उनीहरूले आरोप लगाएका छन् ।
Advertisement
