काठमाडौँ । विश्वविद्यालयको सङ्ख्या १३ पुगे पनि ८० प्रतिशत विद्यार्थी त्रिभुवन विश्वविद्यालयमा अध्ययरत रहेको पाइएको छ ।
उच्चस्तरीय आर्थिक सुधार आयोगले प्रस्तुत गरेको प्रतिवेदनले विश्वविद्यालयमा विद्यार्थी सङ्ख्या कम भएको देखाएको छ ।
प्रतिवेदनमा शिक्षासम्बन्धी १४ बुँदे सुझाव प्रस्तुत गर्दै न्यून विद्यार्थी हुने विश्वविद्यालयलाई उत्पादन दक्षता बढाउन र प्रतिएकाइ लागत घटाउन लगाउनुपर्ने सुझाव दिइएको छ ।
आयोगले चिकित्साशिक्षा, इन्जिनियर र पाइलट पढ्न कोटा प्रणाली खारेज गर्नुपर्ने सुझाव दिएको छ । विशिष्टीकृत सेवामा कोटा प्रणाली लागु गर्दा उत्पादन ऋणात्मक बनेको प्रतिवेदनमा उल्लेख गरेको छ ।
आज चैत २९ गते सार्वजनिक भएको उच्चस्तरीय आर्थिक सुधार प्रतिवेदनले नेपालमा शैक्षिक स्थितिको असमान वितरण भएको भन्दै १० जिल्लामा छुट्टै कार्यक्रम सञ्चालन गर्न पनि सुझाव दिएको छ ।
रौतहट, महोत्तरी, सर्लाही, हुम्ला, बारा, सिराहा, धनुषा, डोल्पा, सप्तरी, सिन्धुपाल्चोक जिल्लाका विद्यालयमा विशेष कार्यक्रम सञ्चालन गरी साक्षरता दर र शैक्षिकस्तर सुधार गर्न सुझाव दिएको हो ।
सामुदायिक विद्यालयमा विद्यार्थीको सङ्ख्या घट्दै गएको भन्दै प्रतिवेदनले ६० प्रतिशत सामुदायिक विद्यालयमा सयभन्दा कम विद्यार्थी सङ्ख्या रहेको देखाएको छ । २.५७ सामुदायिक विद्यालयमा मात्र एक हजारभन्दा बढी विद्यार्थी छन् । अङ्ग्रेजी, गणित र विज्ञान विषयमा विद्यार्थी निकै कमजोर रहेको पाइएको भन्दै प्रतिवेदनले ती विषयमा बिएस नगरेका शिक्षकहरू आउन पाउनुपर्ने व्यवस्था राख्नुपर्ने सुझाव दिएको छ ।
