काठमाडौँ । काठमाडौँमा आन्दोलनरत नेपाल शिक्षक महासंघलाई वार्तामा आउन सरकारले आह्वान गरेको छ
मंगलबार साँझ विज्ञप्ति प्रकाशित गरी शिक्षा, विज्ञान तथा प्रविधि मन्त्रालयले वार्तामा आउन आह्वान गरेको हो ।
चैत २० गतेदेखि आन्दोलनरत शिक्षक महासंघलाई यसअघि सरकारले चैत २१ र २२ गते पनि वार्तामा आउन आह्वान गरेपनि महासंघले अस्वीकार गरेको थियो । महासंघले पुरानो सहमति कार्यान्वयन गर्ने सर्तमा मात्रै वार्तामा बस्ने बताएको छ ।
आफूहरू विद्यालय शिक्षा ऐन कसरी ल्याउने भन्ने विषयमा छलफल गर्ने भए मात्र वार्ता गर्न तयार रहेको शिक्षक महासंघका अध्यक्ष लक्ष्मीकिशोर सुवेदीले बताएका छन् ।
उनले भने, ‘२०८० असोज ५ गतेको सहमतिअनुसार माग पूरा गर्ने विषयमा मात्र छलफल गर्न तयार छौँ। पुनः के–के माग छन् भन्ने विषयमा मात्र हामी वार्तामा बस्दैनौँ।’
शिक्षक महासंघले विगतमा भएका सहमति कार्यान्वयन गर्न र विद्यालय शिक्षा ऐन तत्काल जारी गर्न माग गर्दै चैत २० देखि काठमाडौँमा आन्दोलन गरिरहेको छ।
यस क्रममा चैत २५ देखि शिक्षकहरू अनिश्चितकालीन शैक्षिक हड्तालमा उत्रिएका छन्।
यस अघि पनि शिक्षा मन्त्रालयले चैत २१ र २२ गते शिक्षक महासंघलाई वार्तामा बोलाएको थियो।
तर महासंघले अस्वीकार गर्यो।
