विराटनगर । प्रगतिशील लेखक सङ्घको तेस्रो कोशी प्रदेश सम्मेलन २०८१ चैत १६ गते मोरङको सलकपुरस्थित सुकुना बहुमुखी क्याम्पसमा नयाँ नेतृत्व चयन गर्दै समापन भएको छ ।
प्रलेसका उपाध्यक्ष नमुना शर्माको प्रमुख आतिथ्यमा र तिला लेकालीको अध्यक्षतामा भएको सो कार्यक्रममा प्रलेसका महासचिव डा. देवी दुलाल क्षेत्री र क्यान्सरपीडित साहित्यकार झापाका ज्ञानु बुढाथोकीलाई सम्मान गरिएको थियो ।
दोसल्ला तथा सम्मानपत्रद्वारा सम्मानित दुवै स्रष्टा लामो समयदेखि प्रलेसमा आबद्ध भएर लेखनकार्यमा संलग्न हुनुहुन्थ्यो ।
कार्यक्रमका प्रमुख अतिथि प्रलेसका केन्द्रीय उपाध्यक्ष नमुना शर्माले प्रलेस नेपालका बिचमा अहिले चुनौती थपिएको र गणतन्त्रका विरुद्धमा गलत प्रचार गर्दै समाजलाई भाँड्ने, अनावश्यक प्रचार गर्ने विरुद्धमा प्रलेस मात्र होइन, सिङ्गो समाज नै र गणतन्त्रका पक्षधर एकजुट भएर लाग्नुका साथै कलम चलाएर भ्रमका विरुद्ध उभिनुपर्ने बताउनु भयो ।
विशिष्ट अतिथि प्रलेसका महासचिव तथा सम्मानित स्रष्टा डा देवी क्षेत्री दुलालले प्रलेसले लेखनमा स्रष्टालाई प्राथमिकतामा राख्ने बताउनुभयो ।
प्रलेस कोशी प्रदेशका उपाध्यक्ष दिनेश थापाको स्वागत मन्तव्य र सहसचिव कविता केशरीको स्वागत गीतबाट सुरु भएको सो कार्यक्रममा प्रलेस केन्द्रीय सदस्यहरू राजेन्द्र सङ्ग्रौला, बोधकुमार घिमिरे, प्राज्ञ खेमराज खनाल, साहित्यकार ईरानराई, प्रलेस राष्ट्रिय परिषद सदस्य केशु कार्की, जनसांस्कृतिक महासङ्घ कोशी प्रदेशका अध्यक्ष जिबी थुलुङ, भरत गुरागाईं बर्बरिक, प्रलेसका पूर्व केन्द्रीय सदस्य हेमनाथ अधिकारी, पूर्व प्रतिनिधिसभा सदस्य तथा स्रष्टा हर्कमान तामाङ र राजकुमार ओझा सहभागी हुनुहुन्थ्यो ।
कार्यक्रममा मोरङका स्रष्टा दीप मङ्ग्राती, प्रदेशसभा सदस्य विद्या चाम्लिङ, तेह्रथुमका स्रस्टा रोशन यात्री, सुनसरीका स्रष्टा मुक्ति पोखरेल, साजन भट्टराई र शेखर थापाले आआफ्ना रचना वाचन गर्नुभएको थियो ।
कार्यक्रमको सञ्चालन सचिव राजेन्द्र सर्वहाराले गर्नुभएको थियो ।
सम्मेलनले झापाका विन्दु दाहाल मूकदर्शकको नेतृत्वमा ३९ सदस्यीय कार्यसमिति गठन गरेको छ ।
समितिको उपाध्यक्षमा दिनेश थापा र शान्ति पाख्रिन, सचिवमा रविन कोर्काली, सहसचिवमा कमल भट्टराई र कोषाध्यक्षमा डिल्लीराम परदेशी सर्वसम्मत चयन हुनुभएको छ ।
त्यस्तै, सदस्यहरूमा मोरङका उर्मिला शर्मा रिजाल, हीरा खड्का अधिकारी र यज्ञ परिश्रमी, इलामका विवश बलिभद्र कोइराला, झापाका अमिर बासकोटा अदृश्य, ज्ञानु बुढाथोकी र दिलीप घिमिरे, सुनसरीका टीका मिलन र राजेन्द्र खत्री, धनबहादुर खड्का, उदयपुरका चन्द्रनारायण चौधरी, तेह्रथुमका रोशन यात्री, रामप्रसाद लम्साल, मनिषा आचार्य रहनुभएको छ ।
(फित्कौली डट कम)
