जगदीश ढकाल, नेपालगञ्ज ।
कल्पना फाउन्डेसन नेपालको आयोजनामा कथाकार कल्पना पौडेल ‘जिज्ञासु’ को ‘कल्पध्वनि’ लघुकथा सङ्ग्रहको समीक्षा कार्यक्रम सम्पन्न भएको छ ।
२०८१ चैत १६ गते शनिबार बाँकेको ज्ञानोदय बहुमुखी पब्लिक क्याम्पस खजुरामा सो कार्यक्रम सम्पन्न भएको हो ।
साहित्य विभाग सदस्य तथा ज्ञानोदय प्रमुख चरित्रा शाहको अध्यक्षता तथा लुम्बिनी प्राविधिक विश्वविद्यालय सेवा आयोगकी सदस्य तथा वरिष्ठ साहित्यकार प्राडा कृष्णप्रसाद घिमिरेको प्रमुख आतिथ्यमा सो कार्यक्रम सम्पन्न भएको थियो ।
सोही कार्यक्रममा फाउन्डेसनको वार्षिक पत्रिका ‘कल्पाङकुर’ को विमोचनपश्चात् बाँके जिल्लाबाट यस वर्ष विद्यावारिधि उपाधि प्राप्त गर्न सफल डा. हरिप्रसाद तिमल्सिना, डा. कविन्द्र भट्टराई, डा. राजकुमार थारूलाई बधाई तथा शुभकामना व्यक्त गरिएको थियो ।
कार्यक्रममा जिज्ञासुको लघुकथा ‘कल्पध्वनि’ को समीक्षा समीक्षकद्वय बोधराज प्याकुरेल र लेकप्रसाद प्याकुरेलले गर्नुभएको थियो भने पाठकको तर्फबाट साहित्यकार जितबहादुर शाह, हीराबहादुर खत्री र हितेष पौडेलले पूरक जिज्ञासा राख्नुभएको थियो ।
समीक्षकहरूले ‘कल्पध्वनि’ मा समेटिएका ५५ ओटै कथा प्रगतिशील र नारीवादी दृष्टिकोणयुक्त रहेको टिप्पणी गरेका थिए ।
विशिष्ट अतिथि प्रज्ञा सदस्य शशिराम कार्की र पूर्णबहादुर भण्डारी रहेको सो कार्यक्रममा फाउन्डेसनको तर्फबाट इन्दिरा गौतमले स्वागत मन्तव्य दिनुभएको थियो भने ऋषिराम सापकोटाले कार्यक्रमबारे प्रकाश पार्नुभएको थियो ।
प्रत्येक वर्ष एउटा कृति प्रकाशन गर्दै आएकी कृतिकार पौडेलले उपस्थित सबैलाई धन्यवाद ज्ञापन गर्नुभएको थियो ।
गीता अर्यालको सञ्चालनमा अघि बढेको उक्त कार्यक्रममा भारतीय साहित्यकार सारिक रब्बानी र सुन्दर गुरुङले कवितावाचन गर्नुभएको थियो ।
कार्यक्रममा ७० जना साहित्यकार र क्षैशिक व्यक्तित्वको उपस्थिति रहेको थियो ।
