खलङ्गा । गौमुखीको एक माध्यमिक विद्यालयमा फेल भएका विद्यार्थीलाई पास गराइएपछि तीन राजनीतिक दलले छानबिन गर्न माग गरेका छन् ।
गौमुखी गाउँपालिका–५ स्थित जनसहयोगी माध्यमिक विद्यालयमा देखिएको अनियमितताबारे २०८१ चैत १५ गते शुक्रबार राष्ट्रिय जनमोर्चा, नेकपा (एमाले) र माओवादी केन्द्र्रले गौमुखी गाउँपालिकाका प्रमुख प्रशासकीय अधिकृत तुलसीराम पौडेललाई ज्ञापन बुझाएका हुन् ।
राजमोका जनक केसी, एमालेका जुमानसिंह जिसी र माओवादी केन्द्रका रमेश रानाको हस्ताक्षरमा बुझाइएको ज्ञापनमा शिक्षा क्षेत्रमा देखा परेको यस्तो अनियमितताबाट सिङ्गो परीक्षा प्रणाली र गाउँपालिकाकै भूमिकामाथि प्रश्नचिह्न उब्जिएको उल्लेख छ ।
“यसबाट अभिभावक र विद्यार्थीमा गम्भीर नैराश्यता उत्पन्न भएको छ” ज्ञापनपत्रमा भनिएको छ– “यस प्रकारको अनियमिततामा संलग्न व्यक्तिमाथि गम्भीर छानबिन गरी अनियमिततामा संलग्न व्यक्तिलााई सबै प्रकारको जिम्मेवारीबाट पदमुक्त गरी शिक्षा ऐन–नियमावलीअनुसार कडा कारबाही गर्न यो ज्ञापनपत्र पेस गरेका छौँ ।”
जनसहयोगी माविका कक्षा ५ र ८ को नजिता यही चैत ११ गते प्रकाशित भएको थियो । नतिजामा सो विद्यालयका १७ जनामध्ये १५ जनालाई पास गराइएको छ ।
५० पूर्णाङ्कको परीक्षामा पास हुनलाई १८ अङ्क चाहिनेमा ८ देखि १२ अङ्क प्राप्त गरेका चार जना विद्यार्थीलाई पास गराएको तर १४ अङ्क प्राप्त गरेको अर्को विद्यार्थीलाई फेल गराएको आरोप परीक्षा समितिका सदस्यसमेत रहेका प्रधानाध्यापक अमृतबहादुर केसीमाथि लागेको छ ।
परीक्षामा आठ जना मात्रै पास भएकोमा पालिकाको निर्णयअनुसार १५ अङ्क प्राप्त गरेका ११ जनालाई पास गराइएको थियो । प्रअ केसीले अनियमितता गरेर थप चार जनालाई पास गराएको बताइएको छ । विद्यालयको उत्तरपुस्तिका भृकुटी माविमा जाँच जर्दा आठ जना मात्रै पास भएका थिए ।
यता, पालिकाले भुलवश नतिजा स्वीकार गरेको बताउँदै अनियमितताको छानबिन गर्ने बताएको छ ।
कानुनअनुसार प्रअ केसी दोषी पाइए एक लाख रुपियाँ जरिवाना र छ महिनासम्म कैदसजाय हुने प्रावधान छ ।
सो विद्यालयको व्यवस्थापन समितिका अध्यक्ष वरुणध्वज मल्ल हुनुहुन्छ । उहाँ वडा नं. ५ को वडाअध्यक्ष पनि हुनुहन्छ ।
यस सन्दर्भमा उहाँले घटनाको छानबिन गरेर दोषीमाथि कारबाही गरिनुपर्ने माग राख्नुभएको छ ।
त्यस्तै, राजमो प्युठानका अध्यक्ष ज्ञामुराम न्यौपानेले पनि आफ्नो पार्टी सो घटनाको निष्पक्ष छानबिन गरेर दोषीउपर कानुनबमोजिम कारबाही हुने पक्षमा रहेको प्रतिक्रिया युगदर्शनलाई दिनुभएको छ ।
