पोखरा । कास्कीपोखरास्थिति पृथ्वीनारायण क्याम्पसको स्ववियु निर्वाचन समितिले राजीनामा दिनुपर्ने अखिल (छैठौं) को ठहर छ ।
अखिल (छैठौं) पिएन क्याम्पस एकाइ समितिका संयोजक तथा स्ववियु सभापति पदका उम्मेदवार मिलन सुनारको हस्ताक्षरमा जारी २०८१ चैत ७ गते बिहीबार प्रेसविज्ञप्तिमा सो ठहर गरिएको हो ।
विज्ञप्तिमा युनियनले पिएन क्याम्पसको निर्वाचन समिति नै स्ववियु निर्वाचन गर्न नचाहेको आरोप लगाइएको छ । “निर्वाचनलाई भयरहित वातावरण र विद्यार्थी सङ्गठनका आपसी भाइचारा सम्बन्धले निर्वाचन सुनिश्चित हुँदै गएको दृष्य देखेका केही प्रतिक्रियावादी र प्रतिगामी तत्त्वको दूषित मनसाय पूरा गर्न स्वयम् निर्वाचन समिति नै लाग्नुले योभन्दा लाजमर्दो र हास्यास्पद सुनियोजित परिघटना देखिँदै आएको छ” विज्ञप्तिमा भनिएको छ ।
निर्वाचनको दिन चैत ५ गते अखिल (छैठौं) को तर्फबाट सभापति पदका उम्मेदवारको पक्षमा मतप्रकट गर्ने स्थान नै नराखी निर्वाचन प्रक्रिया अगाडि बढाउन खोज्नु, दिनभरि विद्यार्थीलाई लाइनमा लगाएर सच्याइएको मतपत्र ल्याइने दाबी गर्नु तर भोलि पल्ट निर्वाचन गर्ने विज्ञप्ति जारी गर्नु तथा फेरि पनि मतदान नगराउनुजस्ता उदाहरण प्रस्तुत गर्दै विज्ञप्तिमा भनिएको छ– “यो निर्वाचन समिति निष्पक्ष निर्वाचनको पक्षमा कदापि थिएन ।”
विज्ञप्ति अगाडि भनिएको छ– “यसकारण पनि निर्वाचन समितिले नैतिकताको आधारमा राजीनामा दिएर अर्को निर्वाचन समितिले निर्वाचन गराओस् भन्ने सम्बन्धित पक्षलाई यसै विज्ञप्तिमार्फत जानकारी गराउन चाहन्छौँ ।”
त्यस्तै, विज्ञप्तिमा दोहोरो चरित्र नदेखाउन निर्वाचन समितिलाई चेतावनी दिइएको छ ।
