बेलबारी (मोरङ) । प्रगतिशील लेखक सङ्घ नेपाल मोरङको एघारौँ जिल्ला सम्मेलन २०८१ चैत २ गते शनिबार सम्पन्न गरिएको छ ।
प्रलेस कोशी प्रदेशकी अध्यक्ष तिला लेकालीको प्रमुख आतिथ्यमा सुकुना बहुमुखी क्याम्पस, सुन्दरहरैँचाको सभाकक्षमा सो सम्मेलन सम्पन्न भएको हो ।
सो अवसरमा मन्तव्य राख्दै लेकालीले सबै जना मिलेर खटियो भने मात्र प्रगतिशील लेखनको विकासलाई छिटो विकास गर्न सकिने दाबी गर्नुभयो ।
सम्मेलनमा मन्तव्य राख्दै निर्वाचन समितिका अध्यक्ष ईरानराईले नेपालका वामपन्थी दलहरू कहिले मिल्ने त कहिले एकार्कालाई शत्रुतापूर्ण व्यवहार गर्दै आइरहे तापनि प्रलेसले नेपाली प्रगतिवादी लेखकलाई सधैँ एकै ठाउँ उभ्याएको गर्विलो इतिहासलाई अझ दर्बिलो बनाउने जिम्मेवारी नयाँ समितिको काँधमा आएको बताउनुभयो ।
कार्यक्रममा क्यान्सरको चौथो चरणको आक्रमणसँग सङ्घर्षरत झापाका प्रलेस ज्ञानु बुढाथोकीजस्ता हिम्मतिलो लेखकले पूर्वी पहाडी जनजीवनको रसिलो चित्रण गरेकाले उपन्यास ‘याङरूप’ पठनयोग्य भएको चर्चा डा. दीपक न्यौपानेले गरेका थिए ।
सुन्दरहरैँचा, मोरङका निबन्धकार दुर्गा खरेल ‘दीपज्वाला’ को १० ओटा निबन्धको सङ्ग्रह ‘विश्वमानव’ प्रमुख अतिथिलगायतले सामूहिक लोकार्पण गर्नुभएको थियो ।
उक्त कृतिको चर्चा साहित्यकार केशु विरहीले गर्नुभएको थियो ।
सम्मेलनले निवर्तमान उपाध्यक्ष केराबारी गाउँपालिका निवासी लेखक यज्ञराज सुसेलीको अध्यक्षतामा पछि थप गर्नेगरी तेह्र सदस्यीय जिल्ला समिति सर्वसम्मतिले चयन गरेको छ ।
समितिको उपाध्यक्ष देवेन्द्र पौडेल, सचिव नानुमैया दाहाल, सहसचिवमा भवानीप्रसाद पोखरेल र कोषाध्यक्ष शैलेन घिमिरे शैलेन्द्र तथा सदस्यमा सञ्जीव तिम्सिना, भीम कोइराला, उमा गुरागाई, यज्ञ परिश्रमी, शारदा दाहाल भण्डारी, अञ्जली कठैत, दुर्गा खरेल र शान्ता कर्ण रहनुभएको छ ।
कार्यक्रममा प्रलेस मोरङका पहिलो अध्यक्ष एकराज भट्टराई, पूर्व अध्यक्षहरू मोहन काफ्ले, भानु भण्डारी, आचार्य अ., वरिष्ठ साहित्यकारहरू हर्कमान तामाङ, मेदिनीप्रसाद बराल, हरिहर भण्डारी, मधु पोखरेल, गोपाल निर्भीक तथा साहित्यकारहरू राजेन्द्र सर्वहारा, ओम श्रमिक, शिवनारायण पण्डित सिङ्गल, कविता केसरी, राम खरेल, विमला पोख्रेल, खगिन्द्र खुसी, रमेश निरौला र दीप मङ्ग्रातीको आतिथ्य रहेको थियो ।
उद्घाटन सत्रको अध्यक्षता तत्कालीन अध्यक्ष विदुर सुवेदी र सञ्चालन सचिव धनजित पराजुलीले गर्नुभएको थिए भने निर्वाचन र घोषणाको सञ्चालन जेबी थुलुङ र मायामितु न्यौपानेले गर्नुभएको थियो ।
