टेकराज भुसाल, सन्धिखर्क ।
अर्घाखाँचीको भूमिकास्थान नगरपालिकाले सञ्चालन गरेको कर्मशील जनशक्ति परिचालन कार्यक्रम प्रभावकारी बन्दै गएको छ ।
स्वरोजगार सिर्जना गर्ने, बसाइँसराइ नियन्त्रण गर्ने र आन्तरिक आम्दानी वृद्धि गरि भूमिकास्थानलाई आत्मनिर्भर बनाउने लक्ष्यका साथ कर्मशील कार्यक्रम ल्याएको भूमिकास्थान नगरपालिकाले जनाएको छ ।
पालिकाले प्राकृतिक रेशाजन्य वनस्पति थाकलको पात र मकैको पोस्करबाट निर्माण हुने हस्तकला सामाग्रीलाई व्यवसायिक रूपमै अगाडि बढाएको दाबी गरेको छ ।
गत आर्थिक वर्षमा सय बढी कर्मशील महिला उद्यमी तयार गरी मकैको पोस्कर र थाकलबाट टोपी र झोला निर्माण गरेको पालिकाले यस वर्ष पाँच सय बढीलाई रोजगारी दिने लक्ष्य राखेको नगरप्रमुख झबिलाल थापाले बताउनुभयो ।
नगरप्रमुख थापाले हाइब्रिड जातको मकैको पोस्करबाट टोपी, झोला निर्माण नहुने भएकाले नगरपालिकाले बाझो जग्गामा कमशील रोजगार कार्यक्रममार्फत मकैको बिउ उत्पादन गरेर नगरपालिका मकैको बिउमा आत्मनिर्भर बनेको समेत थापाले बताउनुभयो ।
नगर उपप्रमुख बालाकृष्ण बन्जाडेले मकैको पोस्कर र थाकलबाट निर्माण गरिएका टोपी र झोलामा बजारीकरणको कुनै समस्या नरहेको दाबी गर्नुभएको छ ।
ओम राजश्री मल्टिएग्रो प्रालि काठमाडौँले गत आर्थिक वर्षमा तालिम लिएकामध्य निरन्तर सामान निर्माण गर्ने भूमिकास्थान–३ कि लीला विकलाई नगद ३० हजार रुपियाँसहित प्रमाणपत्रले सम्मान गरेको थियो ।
